နိုင်ငံရေး အကျဉ်းသား လွှတ်ပေးရေး လူ့အခွင့်အရေး ကိုယ်စားလှယ် ထပ်မံ တောင်းဆို

24 March 2009

မစ္စတာ ကင်တားနား (မတ်လ ၂၀၀၉)

မြန်မာနိုင်ငံအတွင်းမှာ ယုံကြည်ချက်ကြောင့် အကျဉ်းချခံနေရသူ နိုင်ငံရေး အကျဉ်းသားတွေ အားလုံးကို လွှတ်ပေးဖို့ ကုလသမဂ္ဂရဲ့ လူ့အခွင့်အရေးဆိုင်ရာ အထူးကိုယ်စားလှယ် မစ္စတာ သောမတ်စ် အိုဟေးလ် ကင်တာနား(Tomas Ojea Quintana) က မြန်မာစစ်အစိုးရကို တိုက်တွန်းလိုက်ပါတယ်။ မတ်လ ၁၈ရက်နေ့က ဆွစ်ဇာလန်နိုင်ငံ (Switzerland) ဂျနီဗာ (Geneva) မြို့  ကုလသမဂ္ဂ လူ့အခွင့်အရေးကောင်စီ အစည်းအဝေးမှာ မြန်မာနိုင်ငံ လူ့အခွင့်အရေး အခြေအနေ နဲ့ ပတ်သက်လို့ အစီရင်ခံစာ တင်သွင်းရင်း မစ္စတာ ကင်တားနား အခုလို တိုက်တွန်းခဲ့တာ ဖြစ်ပါတယ်။

သင့်မြတ်ရေးအတွက် နိုင်ငံရေး အကျဉ်းသားများ လွှတ်ရန် ၈၈ ကျောင်းသားများ ပြောကြား

ကိုဝိုင်း

ကြာသပတေးနေ့၊ မတ်လ 26 2009 17:42 - မြန်မာစံတော်ချိန်

ချင်းမိုင် (မဇ္ဈိမ)။ ။ အနာဂတ်မြန်မာပြည်ကို စုပေါင်းဆောင်ရွက်နိုင်ရန် ဖမ်းဆီးထားသည့် နိုင်ငံရေးအကျဉ်းသားအားလုံးကို ချွင်းချက်မရှိ ပြန်လွှတ်ရန် ၈၈ မျိုးဆက် ကျောင်းသားများအဖွဲ့က မြန်မာစစ်အစိုးရကို ယနေ့ တောင်းဆိုလိုက်သည်။ အမျိုးသား ပြန်လည်သင့်မြတ်ရေးအတွက် ပြည်တွင်း၊ ပြည်ပမှ ဒီမိုကရေစီအင်အားစုများနှင့် နိုင်ငံတကာ မိသားစုတို့၏ အလေးအနက် တောင်းဆိုချက်ဖြစ်သော အားလုံး လက်ခံပါဝင်နိုင်မည့် နိုင်ငံရေးအခင်းအကျင်းတရပ် ဖန်တီးပေးနိုင်ရန်အတွက် နိုင်ငံရေးအကျဉ်းသားများကို လွှတ်ပေးရန် လိုအပ်ခြင်းဖြစ်ကြောင်း ယနေ့ထုတ် ထုတ်ပြန်ချက် စာအမှတ် ၁/၂ဝဝ၉ (၈၈) တွင် ဖော်ပြထားခြင်းဖြစ်သည်။ ဗိုလ်ချုပ်အောင်ဆန်း ဦးဆောင်သည့် တပ်မတော်နှင့်အတူ နိုင်ငံရေးအဖွဲ့အစည်းများ၊ တိုင်းရင်းသား ပြည်သူတရပ်လုံးက ညီညွတ်စွာ လက်တွဲခဲ့ပြီး နယ်ချဲ့နှင့် ဖက်ဆစ်တို့ကို တော်လှန်၍ လွတ်လပ်ရေးရခဲ့ခြင်း ဖြစ်သောကြောင့် ဒီမိုကရေစီနိုင်ငံ တည်ဆောက်မည်ဆိုလျှင် တိုင်းရင်းသားများ၏ အခန်းကဏ္ဍကို အသိမှတ်ပြုရန်မှာ အရေးကြီးကြောင်းလည်း ဆိုထားသည်။ ထို့အပြင် နအဖ စစ်အစိုးရက တဖက်သတ် ပြဋ္ဌာန်းအတည်ပြုထားသော ဖွဲ့စည်းပုံ အခြေခံဥပဒေသည် တိုင်းရင်းသားများ၏ အခွင့်အရေးများကို အာမခံထားခြင်း မရှိကြောင်း ၈၈ မျိုးဆက် ကျောင်းသားခေါင်းဆောင် ကိုစိုးထွန်းက ပြောသည်။ “အဓိကက အားလုံးစည်းလုံးညီညွတ်မှုပေါ့ဗျာ။ အမျိုးသားပြန်လည်သင့်မြတ်ရေးမှာ တိုင်းရင်းသားတွေရဲ့ စည်းလုံးညီညွတ်မှုဟာ အရေးကြီးတယ်လေ။ တိုင်းရင်းသားတွေအတွက် တန်းတူအခွင့်အရေး၊ ကိုယ်ပိုင်ပြဋ္ဌာန်းခွင့်တွေအတွက် ဒီ တိုင်းပြည်ရဲ့ အသက်ဖြစ်တဲ့ ကွန်စတီကျူးရှင်း (ဖွဲ့စည်းပုံ) မှာ ကန့်သတ်ထားတာတွေ ရှိတယ်။ ဒါ မဖြစ်သင့်ဘူး။ ဒါကြောင့် တဖက်သတ် ရေးဆွဲပြဋ္ဌာန်းထားတဲ့ ဒီကွန်စတီကျူးရှင်းကိုလည်း ပြန်သုံးသပ်ဖို့ တောင်းဆိုထားတာပါ” ဟု သူက မဇ္ဈိမကို ပြောသည်။ ယခုတောင်းဆိုချက်များသည် တိုင်းရင်းသားများနှင့် ဒီမိုကရေစီ နိုင်ငံရေးအင်အားစုအားလုံး၏ တောင်းဆိုချက်ပင်ဖြစ်၍ နအဖ က လက်ခံဆောင်ရွက်ခြင်း မရှိပါက တိုင်းရင်းသားစည်းလုံးညီညွတ်မှုများ ပြိုကွဲကာ တိုင်းပြည်၏ အနာဂတ် ပျက်သုန်းရန်သာရှိပြီး ငြိမ်းချမ်း၍ ခေတ်မီဖွံဖြိုးတိုးတက်သည့် နိုင်ငံတော်သို့ ချီတက်ရန်လည်း မဖြစ်နိုင်ကြောင်း ၈၈ မျိုးဆက် ကျောင်းသားအဖွဲ့က အလေးအနက်ထား၍ ထုတ်ဖော်ပြောဆိုခြင်းဖြစ်ကြောင်း သူက ဆက်ပြောသည်။ နိုင်ငံရေးအကျဉ်းသား အားလုံးကို လွှတ်ပေးရေးနှင့် ဖွဲ့စည်းပုံ အခြေခံဥပဒေအသစ်ကို ပြန်လည်သုံးသပ်ရေးအတွက် ကော်မတီဖွဲ့ပေးရန် အန်အယ်ဒီပါတီ အပါအဝင် တိုင်းရင်းသား အဖွဲ့အစည်းများကလည်း စစ်အစိုးရထံ အကြိမ်ကြိမ် ထုတ်ပြန်တောင်းဆိုနေသည်။ သို့သော် တစုံတရာ အကြောင်းပြန်ကြားခြင်း မရှိသည်သာမက သံဃာတော်များ၊ အန်အယ်ဒီ ပါတီဝင်များ၊ ၈၈ မျိုးဆက် ကျောင်းသားခေါင်းဆောင်များ၊ တိုင်းရင်သားခေါင်းဆောင်များ၊ ဒီမိုကရေစီအရေး တက်ကြွလှုပ်ရှားသူများကို ဖမ်းဆီး၍ နှစ်ရှည်ထောင်ဒဏ်များ ချမှတ်ခြင်း၊ နယ်ထောင်များသို့ ရွှေ့ပြောင်းခြင်းတို့ကို ဆက်တိုက်လုပ်ဆောင်နေခဲ့သည်။

မင်းနိုင်သူ / မတ်လ(၂၄) ရက်၊ ၂၀၀၉

ဒေါ်အောင်ဆန်းစုကြည်အား ဖမ်းဆီးထိန်းသိမ်းထားခြင်းသည် မြန်မာစစ်အစိုးရဘက်က ကိုယ့်ဥပဒေကို ကိုယ်ချိုးဖောက်ရာကျသကဲ့သို့ နိုင်ငံတကာဥပဒေကိုလည်း ချိုးဖောက်ရာကျကြောင်း ကုလသမဂ္ဂက ထုတ်ဖော် ပြောဆိုသည်။

တရားလက်လွတ် ဖမ်းဆီးမှုဆိုင်ရာ ကုလသမဂ္ဂလုပ်ငန်းအဖွဲ့၏ ဥပဒေရေးရာ သုံးသပ်ချက်တွင် ယခုကဲ့သို့ ဖော်ပြထားခြင်းဖြစ်ပြီး ကုလသမဂ္ဂအဖွဲ့ဝင် နိုင်ငံတနိုင်ငံအား ကိုယ့်ဥပဒေကို ကိုယ်ချိုးဖောက်ကြောင်း ဝေဖန် သည်မှာ ပြောရိုးပြောစဉ်မဟုတ်ဟု ဆန်းစစ်သူများက ပြောသည်။

ယင်းသို့ ကုလသမဂ္ဂက ထုတ်ဖော်ပြောဆိုခြင်းကြောင့် ဒေါ်အောင်ဆန်းစုကြည် ရုတ်တရက် လွတ်မည်ဟု မထင်သော်လည်း နအဖအား ကာကွယ်ပေးနေသည့် တရုတ်၊ ရုရှ စသည့် နိုင်ငံများအပေါ် ဖ်ိအားပေးနိုင်ရန် ကုလသမဂ္ဂအပေါ် အရေးပါသည့် ဂယက်ဖြစ်နိုင်သည်ဟု ယူဆကြောင်း ဒေါ်အောင်ဆန်းစုကြည်အတွက် အခမဲ့ရှေ့နေလိုက်ပေးနေသူ ၀ါရှင်တန်ဒီစီမှ ရှေ့နေ ဂျရတ် ဂျင်ဆာက ပြောသည်။

ဒေါ်အောင်ဆန်းစုကြည်သည် နိုင်ငံတော်လုံခြုံရေး သို့မဟုတ် ပြည်သူအများ တည်ငြိမ်အေးချမ်းမှုအတွက် အန္တရာယ်ဖြစ်နိုင်သူလားဆိုသည်ကိုလည်း အဆိုပါ ဥပဒေသုံးသပ်ချက်တွင် မေးခွန်းထုတ်ထားသည်။

“အခုဟာက အစိုးရက ကိုယ့်ဥပဒေကိုတောင် မလေးစားဘူးလို့ ပြောလိုက်တာပေါ့။ တနည်းအားဖြင့် ပြောမယ်ဆို ရင် ထဲထဲဝင်ဝင်ကို ဝေဖန်လိုက်တာဖြစ်တဲ့အတွက် နအဖစစ်အစိုးရအတွက် အင်မတန်မှ ရှက်စရာကောင်းပါတယ်။ မြန်မာပြည်မှာ တရားဥပဒေစိုးမိုးမှု မရှိတော့ဘူးဆိုတာကို ပြောလိုက်တာပေ့ါ။ အဲဒီအချက်ကို နိုင်ငံတကာက အသိအမှတ်ပြုလာရတဲ့ အနေအထားဖြစ်လာတာပေါ့။ နိုင်ငံတကာအသိုင်းအ၀န်းကြားမှာ နအဖအစိုးရအနေနဲ့ အရှက်တကွဲဖြစ်ရတဲ့ ကိစ္စတွေဖြစ်လာတော့ အနည်းနဲ့ အများဆိုသလို အရေးယူဖြေရှင်းပေးရမယ့် အနေအထား ဖြစ်လာမယ်လို့ ကျနော်ထင်တယ်” ဟု ပြည်သူလွှတ်တော်ကိုယ်စားလှယ်များသမဂ္ဂ အတွင်းရေးမှူး လွှတ်တော် ကိုယ်စားလှယ် ဦးသိန်းဦးက သုံးသပ်သည်။

ဒေါ်အောင်ဆန်းစုကြည် နေအိမ်အကျယ်ချုပ်အမှုကို ဆောင်ရွက်ပေးနေသူ ရှေ့နေဦးကြည်ဝင်းကမူ ယခုလ (၁၃) ရက်တွင် အယူခံကိုကြားနာပေးပါရန် ၀န်ကြီးချုပ်ထံ မေတ္တာရပ်ခံစာကို ပေးပို့ထားသည်ဟု ပြောသည်။ အယူခံကို
၉-၁၀-၂၀၀၈ ခုနှစ်ကတည်းက တင်သွင်းခဲ့ခြင်းဖြစ်သော်လည်း နအဖစစ်အစိုးရဘက်က ကိုင်တွယ်ဆောင်ရွက်ခြင်း မရှိသဖြင့် မေတ္တာရပ်ခံစာများ ပေးပို့ခဲ့သည်မှာ လေးကြိမ်ထက်မနည်းရှိပြီ ဖြစ်သည်ဟုလည်း ပြောသည်။

ဒေါ်အောင်ဆန်းစုကြည် နေအိမ်အကျယ်ချုပ်ချထားမှုနှင့်စပ်လျဉ်း၍ စုံစမ်းခဲ့ကြောင်း မြန်မာနိုင်ငံဆိုင်ရာ လူ့အခွင့်အရေးကိုယ်စားလှယ် မစ္စတာတောမတ်ကင်တားနားက မတ်လ (၁၇) ရက်၌ လူ့အခွင့်အရေးကောင်စီတွင် အစီရင်ခံခဲ့သေးသည်။ ယင်းအစီရင်ခံစာတွင် ယင်းအမှုကို အစိုးရဘက်မှ လက်ခံရရှိကြောင်း၊ အဆိုပါကိစ္စနှင့် ပတ်သက်ပြီး တရားသူကြီးချုပ်နှင့် ပြည်ထဲရေးအား စုံစမ်းရန် ညွှန်ကြားထားကြောင်း ပြည်ထဲရေးဝန်ကြီး ဗိုလ်ချုပ်မောင်ဦးက ရှင်းပြခဲ့သည်ဟု ဖော်ပြထားသည်။

ရှေ့နေကြီး ဦးကြည်ဝင်းကမူ ယင်းအမှုသည် တရားသူကြီးချုပ်နှင့် မဆိုင်တော့ဘဲ အစိုးရအဖွဲ့တာဝန်ရှိသူ ၀န်ကြီးချုပ် သို့မဟုတ် အစိုးရအဖွဲ့က ဗဟိုအဖွဲ့ ဥက္ကဋ္ဌအဖြစ် တာဝန်ပေးအပ်ထားသူကသာ ကိုင်တွယ်ဆောင်ရွက် ရတော့မည် ဖြစ်သည်ဟု ဆိုသည်။

“ဒေါ်အောင်ဆန်းစုကြည်ကို နေအိမ်သက်တမ်းထပ်တိုးတုန်းက အစိုးရအဖွဲ့ တာဝန်ပေးမှုအရ ဗဟိုအဖွဲ့ ဥက္ကဋ္ဌ ပြည်ထဲရေးဝန်ကြီးနဲ့ သူ့အဖွဲ့ဝင်တွေချထားတဲ့ အမိန့်ကို ကျနော်တို့က ပြန်အယူခံတာဗျ။ အဲဒါကို သူက သူ့အောက်ကို ပြန်ရှင်းခိုင်းနေလို့ မဖြစ်ဘူးလေ။ တရားသူကြီးချုပ်ဆိုတာကလည်း ပုဒ်မ (၂၁) ကို ၁၉၉၁ ခုနှစ်မှာ ဖျက်သိမ်းလိုက်ကတည်းက တရားရုံးချုပ်ရဲ့ကဏ္ဍမပါတော့ဘူးဗျ။ တရားသူကြီးချုပ် ၀င်ရောက်ကိုင်တွယ်ရမယ့် အမှုမျိုးလည်း မဟုတ်တော့ဘူးဗျ။ အဲတော့ အဲလိုပြောဆိုခဲ့တယ်ဆိုရင်တော့ ပြောဆိုမှုတွေကိုက လွဲနေတယ်ဗျ” ဟု ဦးကြည်ဝင်းက ရှင်းလင်းပြောဆိုသည်။

ဒေါ်အောင်ဆန်းစုကြည် အကျယ်ချုပ်အယူခံကုို ကြားနာပေးရန် ရှေ့နေကြီး ဦးကြည်ဝင်းက နအဖ၀န်ကြီးချုပ်ထံ မေတ္တာရပ်ခံစာပေးပို့ပြီး (၆) ရက်အကြာတွင် အန်အယ်လ်ဒီက ပါတီဗဟိုအလုပ်အမှုဆောင် စုံညီအစည်းအဝေး ကျင်းပလိုသည့်အတွက် ဒေါ်အောင်ဆန်းစုကြည်၊ ဦးတင်ဦးတို့နှင့် တွေ့ခွင့်ပေးရန် ပါတီဥက္ကဋ္ဌ ဦးအောင်ရွှေက စစ်အစိုးရ အကြီးအကဲ ဗိုလ်ချုပ်မှူးကြီးသန်းရွှေထံ တင်ပြခဲ့သည်။ ယင်းသို့တောင်းဆိုမှုကို ၂၀၀၈ ခုနှစ် ဇန်န၀ါရီလ အတွင်းက ပြုလုပ်ခဲ့ဖူးသော်လည်း နအဖစစ်အစိုးရဘက်မှ တစုံတရာအကြောင်းပြန်ကြားမှုမရှိခဲ့ပေ။

အန်အယ်လ်ဒီပါတီပြောခွင့်ရပုဂ္ဂိုလ် ဦးဥာဏ်ဝင်းက “ကျနော်တို့ အတွေ့အကြုံတွေအရတော့ အကြောင်းမပြန်တာ များတာပေါ့လေ။ သို့သော်လည်းပဲ လုပ်သင့်လုပ်ထိုက်တဲ့ဟာကို ကျနော်တို့ အားမလျော့ဘဲ လုပ်သွားမယ်။ ပြောစရာရှိတာပြောမယ်။ တင်ပြစရာရှိတာတင်ပြမယ်။ မလုပ်ရင် သမိုင်းအရ၊ နိုင်ငံရေးအရ ဘယ်သူက တာဝန်ရှိလဲ ဆိုတာမျိုး သူ့ဟာသူဖြစ်လာပါလိမ့်မယ်” ဟု ဆိုသည်။

လာဘ်ထိုးမှ နိုင်ငံရေး အကျဉ်းသားများကို ထောင်ဝင်စာ တွေ့ခွင့်ရ

ငြိမ်းချမ်း

အင်္ဂါနေ့၊ မတ်လ 24 2009 14:33 - မြန်မာစံတော်ချိန်

ဒါကာ (မဇ္ဈိမ)။ ။ ရခိုင်ပြည်နယ် ဘူးသီးတောင်ထောင်ရှိ နိုင်ငံရေးအကျဉ်းသား နှစ်ဦးထံ ထောင်ဝင်စာ သွားတွေ့ရာ ထောင်မှူးကို ငွေပေးမှသာ အချိန်ကြာကြာနှင့် လွတ်လပ်စွာ တွေ့ခွင့်ရကြောင်း သက်ဆိုင်သူ ဆွေမျိုးများက မဇ္ဈိမကို ပြောသည်။ ထောင်ဒဏ် ၂ နှစ် ကျခံနေရသော ရခိုင်ပြည်နယ် တောင်ကုတ်မြို့မှ လှုပ်ရှားတက်ကြွသူ မနီနီနွယ်မြင့်နှင့် ကိုချစ်မောင်မောင် ကို မိခင်များက ပြီးခဲ့သည့်လအတွင်း ထောင်ဝင်စာ သွားတွေ့ရာ ဘူးသီးတောင်ထောင်မှူး ဦးတင်ထွန်းကို ငွေကျပ် ၅ သောင်း လာဘ်ထိုးခဲ့ရခြင်း ဖြစ်သည်။ “ငွေမပေးတုန်းက အထက်ကလူကြီး လာစရာရှိလို့ အိမ်ထောင်စုစာရင်း ပါလား၊ ရပ်ကွက်ထောက်ခံစာ ပါလားဆိုပြီး ဟိုမေးဒီမေးနဲ့ တပတ်လောက် တွေ့ခွင့်မပေးဘဲ ပြန်လွှတ်တယ်။ ရက်ကြာလာတော့ မခံနိုင်တာနဲ့ ထောင်ဝန်ထမ်း တယောက်ကို အကျိုးအကြောင်းပြောပြီး ငွေပေးလိုက်တော့မှ နီနီမေမြင့်၊ ချစ်မောင်မောင်တို့နဲ့ ထောင်ဗူးဝမှာ ၃ နာရီလောက် စကားပြောခွင့် ရခဲ့တယ်” ဟု မနီနီမေမြင့်နှင့် ဆွေမျိုးတော်စပ်သူ တောင်ကုတ်မြို့ခံက ပြောသည်။ မနီနီမေမြင့်၏ မိခင် ဒေါ်မြဦးနှင့် ကိုချစ်မောင်မောင်၏ မိခင် ဒေါ်မခင်မြင့်သည် ပြီးခဲ့သည့်လ ၂၁ ရက်နေ့က တောင်ကုတ်မှ ဘူးသီးတောင်သို့ ထွက်သွားသော်လည်း ၂၈ ရက်နေ့မှသာ တွေ့ခွင့်ရပြီး၊ ယခုလ ၂ ရက်နေ့ကျမှ နေအိမ်များသို့ ပြန်ရောက်ခဲ့ကြသည်။ ဘူးသီးတောင်သို့ မလိခ သင်္ဘောဖြင့် သွားရာ တဦးလျှင် အသွားအပြန်စရိတ် ကျပ် ၆ သောင်း၊ စားစရိတ်နှင့် တည်းခိုခန်းခ ၂ သောင်းကျော်၊ သမီးများအတွက် ငွေကြေး၊ ဆေးဝါး၊ အစားအသောက်နှင့် ထောင်မှူးအတွက် လာဘ်ငွေနှင့်ဆိုပါက တခေါက်လျှင် ကျပ် ၄ သိန်းခန့် လိုအပ်ကြောင်း ကိုချစ်မောင်မောင်၏ ဆွေမျိုးတဦးက ဆိုသည်။ ထောင်ဝင်စာတွေ့စဉ် အကျဉ်းဦးစီး အရာထမ်းက စောင့်ကြည့်နေသဖြင့် ထောင်အတွင်းမှ အခြားအနေများကို သိခွင့် မရသော်လည်း၊ အကျဉ်းသူ သမီးများသို့ ငွေနှင့် ဆေးဝါးများ ပေးသွင်းခွင့်ရကြောင်းနှင့် နှစ်ဦးစလုံး၏ ကျမ္မာရေး ကောင်းမွန်ကြောင်း သိရသည်။ သူတို့နှစ်ဦးကို သီးသန့်ဆောင်များတွင် ထားရှိသည်။ အမည်မဖော်လိုသူ ထောင်ဝန်ထမ်းတဦးက “ဘူးသီးတောင်ထောင်မှာ အကျဉ်းသားနဲ့ ထောင်ဝင်စာတွေ့ရမယ့် ရက်ကို သတ်မှတ်ထားတာ မရှိပါဘူး။ အစိုးရ ရုံးပိတ်ရက်က လွဲပြီးတော့ ကျန်တဲ့နေ့တွေမှာ နေ့စဉ် ထောင်ဝင်စာ လာတွေ့ခွင့် ရှိပါတယ်” ဟု ပြောသည်။ ရိုးရိုးတန်း (သံဇကာခြား) နှင့် အထူးတန်း (သံဇကာမရှိ) တွေ့လိုပါက နိုင်ငံရေးအကျဉ်းသား တဦးအတွက် ကျပ်ငွေ ၂ဝဝဝ မှ ၅ဝဝဝ အထိ ပေးဆောင်ရမှုများ ရှိနေကြောင်း သူက ပြောဆိုသော်လည်း၊ မဇ္ဈိမက သီးခြား အတည်ပြုနိုင်ခြင်း မရှိသေးပါ။ လှုပ်ရှားတက်ကြွသူ နှစ်ဦးသည် ရွှေဝါရောင်လှုပ်ရှားမှု နှစ်ပတ်လည် ၂ဝဝ၈ ခုနှစ် စက်တင်ဘာလအတွင်းက တောင်ကုတ်-ရန်ကုန်ကားလမ်း၊ တောင်ကုတ်-သံတွဲကားလမ်းနှင့် မြို့ပေါ်တွင် ကုန်ဈေးနှုန်း ကျဆင်းရေးနှင့် စစ်အစိုးရ ဆန့်ကျင်ရေး စာရွက်များ ဖြန့်ဝေခဲ့ကြသည်။ လှုပ်ရှားမှုအပြီး အာဏာပိုင်များက ဖမ်းဆီးခဲ့ကာ နိုင်ငံတော် လုံခြုံရေးကို ထိခိုက်စေမှု - ပုဒ်မ ၅ဝ၅ (ခ) ဖြင့် တောင်ကုတ်တရားရုံးက ထောင်ဒဏ် ၂ နှစ်စီ ချမှတ်ခဲ့သည်။ နောက်ပိုင်းတွင် သူတို့ကို ဘူးသီးတောင်ထောင်သို့ ပြောင်းရွှေ့ပစ်ခဲ့သည်။ အဆိုပါ ထောင်ထဲတွင် ၈၈ မျိုးဆက် ကျောင်းသားများ အဖွဲ့မှ ခေါင်းဆောင်တဦးဖြစ်သူ ကိုဌေးကြွယ် အပါအဝင် နိုင်ငံရေး အကျဉ်းသား ၂ဝ ခန့်ရှိကြောင်း ထောင်ဝန်ထမ်းက ဆိုသည်။

အကျဉ်းထောင်ထဲက သူရဲကောင်းတွေအတွက် သစ်ချိုသီး

လင်းနွေးအိမ်
မတ် ၁၉၊ ၂၀၀၉ Linn Nwe Eain - The Courage Food for Political Prisoner

၊ ၁ ၊

သရဏဂုံသုံးပါးကို နေ့စဉ်ရွတ်ဖို့ ကျနော် ပျက်ကွက်ရင် ပျက်ကွက်နေလိမ့်မယ်၊ နိုင်ငံရေး အကျဉ်းသား လွတ်မြောက်ရေး ဆိုတာကိုတော့ တနေ့ သုံး၊ လေးခါ ရွတ်ဖြစ်နေပါတယ်။ ဘာလို့လဲဆို သရဏဂုံသုံးပါး ရွတ်ရတာက ကိုယ့်အတွက်ကိုယ်သာ ရွတ်ရတာလို့ ယုံကြည်ပြီး၊ နိုင်ငံရေး အကျဉ်းသား လွတ်မြောက်ရေး ဆိုတာကတော့ မေတ္တာဘာဝနာ ပွားနည်း တမျိုးလို့ ယုံကြည်ထားလို့ ဖြစ်ပါတယ်။ မြန်မာပြည်က ၇ ရက် သားသမီးတွေ နိစ္စဓူဝ ကိစ္စတွေ ပြေလည်ဖို့ ကြိုးပမ်းနေကြတဲ့ ပုဂ္ဂိုလ်တွေက နိုင်ငံရေးအကျဉ်းသား ဖြစ်သွားရသူတွေ မို့လို့လဲ ကျနော်က ဒီလို ယုံကြည်ထားတာပါ။

၊ ၂ ၊

နောက်ကြောတွေ
နောက်ကြောတွေဟာ ဥပက္ခာပြုရက်ကြ။ ငါ့မှာကျန်ရစ်ခဲ့တာက
ငါ့ဖေဖေ၊ မေမေရယ်
ညီလေး၊ ညီမလေးတွေ
နောက်
ရင်ခုန်သံအနီးကြီးနီးသူတချို့။ တချို့က မှုံဝါးဝါး လက်ပြ
သတိယနေ ဆိုသတဲ့
ကိုယ်ချင်းစာမိ ဆိုသတဲ့။

လူတယောက် နိုင်ငံရေးကြောင့် ထောင်ကျသွားပြီဆိုရင် အပြင်က မိတ်ဆွေတွေက သူ့ကို အားပေးဖို့ မေ့သွားတတ်ကြသလို၊ တချို့က ကြောက်တတ်သွားကြပါတယ်။ သူနဲ့ သွားပတ်သက်မိရင် ငါ့ကိုများ အာဏာပိုင်တွေက စောင့်ကြည့်လေမလား၊ ညှိုးတေးလေမလား ပေါ့။ အားပေးသူ နည်းနည်းလေးကတောင် နှစ်ရှည်လများ ကြာလာတော့ အားပေးစကား ပြောဖို့ ပျက်ကွက်လာတတ်ကြပါတယ်။ လူတယောက် ထောင်ကျပြီဆိုရင် ဘယ်နေရာရောက်နေနေ တောက်လျှောက် နောက်ကနေ လိုက်တာက မိသားစုပါပဲ။ ထောင်ထဲက လူကလဲ မိသားစုထောင်ဝင်စာကို မျှော်ရတာပေါ့။ နောက်တော့ ဘယ်သူကများ ကိုယ့်ကို တခုတ်တရ သတင်းမေးလေမလဲပေါ့။ တယောက်ယောက်က သတိရတယ်၊ ကျန်းမာရေး ဂရုစိုက်ပါ ဆိုတဲ့ စကားလေးများ ပါးလိုက်ရင် ကြည်နူးလို့။ အဲဒီလို အားပေးစကား မကြားရတော့လဲ သြော် သူတို့ဘဝတွေနဲ့ သူတို့ ရုန်းကန်နေရလို့ပါလေ ဆိုတဲ့ အတွေးနဲ့ အပြင်ကလူတွေကိုပဲ သနားပြီး ဖြေတွေးရပေါ့။ ဒါပေမယ့် ဘယ်လိုပဲဖြစ်ဖြစ် တိုက်ခန်းထဲကနေ လှမ်းကြည့်လိုက်တော့ ပြုံးပြနေမယ့် မျက်နှာချင်းဆိုင် မျက်နှာတွေထက်၊ တဘက်လှည့်ထားတဲ့ နောက်ကြောတွေကိုပဲ ပိုလို့ တွေ့တွေ့လာရသလို ခံစားရတာ၊ ဒါ နိုင်ငံရေး အကျဉ်းသားတွေရဲ့ တုန်ခါနေတဲ့ နှလုံးအိမ်ပါ။ ဒီလိုလူတွေအတွက် နိုင်ငံရေး အကျဉ်းသား လွတ်မြောက်ရေး ဆိုတဲ့အသံ စကြာဝဠာတခွင်လုံး ကြားအောင် အော်ပေးနိုင်လေလေ၊ သူတို့ကို အားဆေးတိုက်ရာ ရောက်လေလေပါ။ သူတို့ အားတက်လေလေ ကျနော်တို့ လူ့အဖွဲ့အစည်း လွတ်မြောက် ငြိမ်းချမ်းဖို့ ခရီး နီးလေ လေပါ။ ဒါထက်ပိုပြီးပြောရရင် နိုင်ငံရေးအကျဉ်းသား အားလုံး ကျန်းမာပါစေလို့ စစ်အုပ်စု ကြားအောင် အော်ပေးလေ၊ စစ်ခေါင်းဆောင်တွေ စိတ်ကစင့်ကလျားဖြစ်လေပဲ။ မယုံဘူးလား။ မယုံရင် လုပ်ကြည့်လိုက်။

၊ ၃ ၊

အဲသမှာ ငုဝါတွေ
နွေကိုအံတုနေလိုက်ကြပုံများ
ကြိုးဝိုင်းထဲက လက်ဝှေ့သမားလို။ ကျနော်တို့နေခဲ့ရတဲ့ အင်းစိန် သီးသန့်ထောင် တိုက်အမှတ် ၁ ရဲ့ အရှေ့ဘက်ခြမ်းကနေ ကြည့်လိုက်ရင် ထောင်အုတ်ရိုးတန်းရဲ့ အပြင်ဘက်မှာ ငုဝါပင်တွေ လှမ်းတွေ့နေရတယ်။ ဒီလို နွေပူပူရောက်လာရင် ငုဝါတွေကလဲ အလုအယက် တိုးထွက်ခဲ့ကြပုံတွေ တွေ့နေရတာ ပေါ့။ မြန်မာပြည်ရဲ့နွေ ဆိုတာ လွှတ်ပူတတ်တာမျိုး။ ငုဝါ ဆိုတာလဲ နုပြီး ဝါရည်လုနေပေမယ့် အပူကို အံတုနိုင်တဲ့ ပန်းတမျိုး။ သူ့အရောင်ကလဲ အေးမြတယ်။ ဒီလိုဆိုရင် နိုင်ငံရေး အကျဉ်းသားတွေကို ငုဝါလို့ဆိုမယ်။ ဘယ်သူငြင်းချက်ထုတ်မလဲ။ နိုင်ငံရေး အကျဉ်းသားတွေဆိုတာ ကျနော်တို့ခေတ်မှာ တကယ်တော့ စာသင်ခန်းတွေ စာအုပ်ပုံတွေထဲက ထွက်လာတာ များတယ်။ ဘယ်သူ့ကြည့်ကြည့် နုဖတ်ဖတ်နဲ့ အပြင်ပန်းက။ ဒါပေမယ့် အတွင်းထဲမှာ သံမဏိကြိုးတွေနဲ့ ယှက်နွယ်ထားတဲ့ နှလုံးသားတစုံရှိတယ်။ ကဗျာတွေရေးတယ်၊ စာတွေရေးတယ်၊ သီချင်းတွေရေးတယ်၊ သိုးမွှေးချည်နဲ့ ပန်းချီတွေ ရေးကြတယ်။ အုန်းမှုတ်ခွက်ကို ပန်းပုထုကြတယ်။ ဆပ်ပြာကို ပန်းပုထုကြတယ်။ လောကကြီးကိုလဲ ပန်းပုထုကြတယ်။ ပြီးတော့ ကော်ဖီခါးခါး ကြိုက်ကြတယ်။ တဘက်မှာတော့ စစ်သေနတ်တွေနဲ့ ကျည်ဆန်ကို အရည်ကြိုပြီး ကနုတ်ပန်းလုပ်ဖို့ ကြံစည်နေကြတယ်။ မယုံကြည်ရင် ထောင်ထဲသွားကြည့်လိုက်လို့ပဲ ပြောမယ်။

၊ ၄ ၊

လုံအိုးထဲမှာ
ဓာတ်ပြာတွေ၊ ဒြပ်စင်တွေ ရွှေလား
ငွေလား
သိဒ္ဓိပေါက် ဓာတ်လုံးလား။ နိုင်ငံရေး အကျဉ်းသားတွေ နေရတဲ့ တိုက်ခန်း ကျဉ်းကျဉ်းလေးတွေဟာ ဓာတ်လုံးရဖို့ ဖိုထိုးတဲ့ အခါသုံးတဲ့ လုံအိုးလေးတခုလိုပါပဲ။ နေရတာ ကျဉ်းကြပ်ရတဲ့ထဲ အောက်ကလဲ အပူနဲ့တိုက် နေသလိုပေါ့။ အပြင်က ထောင်ဝါဒါတွေ အပူတိုက်နေတဲ့အပြင်၊ အတွင်းရင်ထဲမှာလဲ အပူတွေချည်းပဲလေ။ ဒါပေမယ့် တန်ဖိုးတရားတွေတော့ လုံအိုးထဲမှာ ရှိနေတယ်။ သံမဏိကောင်းရဖို့ ဆေးသားတင်သလိုပေါ့။ ဘယ်လောက်တောင် ဆေးသားတင်ရသလဲဆို ကျနော့် အတွေ့အကြုံတခု ပြောမယ်။ ၁၉၉၈ ခုနှစ် မေလ၊ စိန်ပန်းတွေ ရဲရဲတောက် ပွင့်ကာစပေါ့။ အပြင်မှာ ၈ လေးလုံး ဆယ်နှစ်ပြည့် စိန်ခေါ်သံတွေနဲ့အတူ ကျနော်တို့ကိုလဲ သံခြေကျင်းတွေ ခတ်ပြီး အင်းစိန်ကနေ ဟိုးအထက် မြန်မာပြည်က ထောင်တွေဆီ ပို့တော့တယ်။ ထောင်ထဲမှာ ၆ နှစ်လောက် နေပြီးသား ဆိုတော့ ထောင့်အပြင် တန်း မကြောက်တော့တဲ့ အချိန်။ ကျနော်တို့ ထောင်ပြောင်းလိုက်တဲ့ခရီးမှာ စမ်းချောင်းလွှတ်တော်အမတ် ဦးခင်မောင်ဆွေ၊ ဗကပ ယူဂျီခေါင်းဆောင် ဦးတင်အောင်၊ ကိုချိုအောင်သန်း၊ ဦးမြင့်ဆွေ အဲဒီလို ပုဂ္ဂိုလ်တွေ ပါသလို ကျနော်တို့လို ကျောင်းသားလေးတွေလဲ ပါတယ်။ အားလုံး ၅၉ ယောက်။ နောက်တော့ တောင်ငူထောင် က ကိုသီဟနဲ့ မောင်မှိုင်း ထည့်လိုက်တော့ ၆၁ ယောက်ဖြစ် သွားတယ်။ ရထားတွဲက နှစ်တွဲ။ အဲဒီထဲမှာ ကိုဆက်အောင်နိုင်၊ ကိုနေလင်းစိုးတို့လို နောက်တကြိမ် အသစ်စက်စက် ထောင်ကျပြီးခါစ လူတွေလဲ ပါတယ်။ သူတို့ဆို အဝတ်တထည် ကိုယ်တခု။ ကျနော်တို့ကတော့ ထောင်ဆွေး လူဆွေး ဖြစ်နေပြီဆိုတော့ အသုံးအဆောင် အဟောင်းအမျင်း တချို့ ပါတယ်။ နောက်တော့ ဘဝတူ ရဲဘော်တွေကို ရထားထဲမှာပဲ ပစ္စည်းတချို့ ခွဲပေးလိုက်တယ်။ လမ်းတလျှောက်မှာလဲ ပြည်သူတွေက အတော်လေး ကူညီကြပါတယ်။ ရေတိုက်တဲ့လူက တိုက်၊ ဆေးလိပ်ပေးတဲ့လူက ပေး၊ သရက်သီးကျွေးတဲ့လူက ကျွေးနဲ့။ ကျနော်တို့ အားတက်လိုက်တာများ။ ဒီပုံမျိုးနဲ့ဆိုရင် ထောင်ထဲမှာ နောက်ထပ် နှစ်ပေါင်းများစွာ နေနိုင်တဲ့အထိ အားရှိသွားတယ်။ အစောင့်လိုက်လာတဲ့ ရဲတွေနဲ့ ဝါဒါတွေကတော့ အမှတ်တွေပေးနေတယ်။ နေနှင့်ဦးပေါ့။ ထောင်ရောက်တော့မှ သိမယ် တဲ့။ သူတို့ မျက်လုံးတွေကို ဖတ်ကြည့်လိုက်တော့ တွေ့ရတာကို ပြောတာ။ သူတို့တွေ တကယ် ကြိမ်းထားတယ် ဆိုတာ နောက်တော့လဲ ထောင်အဝင်မှာ တွေ့ရပါတယ်။ ဒီလိုနဲ့ ရန်ကုန်အင်းစိန်ထောင်ကနေ မန္တလေးထောင်၊ မန္တလေးထောင်ကနေ တဆင့် မြင်းခြံ၊ ကလေး၊ မြစ်ကြီးနားထောင်တွေကို အသီးသီး ခွဲပြီး ပို့တယ်။ ဦးခင်မောင်ဆွေ၊ ရွှေတောင်က ကျောင်းဆရာကြီး အဘ ဦးအုန်းကျော်၊ ဦးမြင့်ဆွေ၊ ကိုဆက်အောင်နိုင်၊ မောင်မှိုင်း၊ သံချောင်း၊ အောင်စွမ်၊ ကျနော်၊ ကျနော့်အမှုတွဲ ကိုကျော်သိုက် အပါအဝင် အားလုံး ၁၇ ယောက်က မြင်းခြံထောင်ကို အပို့ခံရတယ်။ ခြေထောက်တွေမှာလဲ ခြေကျင်းဒဏ်ရာတွေနဲ့ပေါ့။ ဒီနေရာမှာ ထပ်ပြောစရာ တခုရှိသေးတယ်။ မန္တလေးထောင်ကနေ မြင်းခြံထောင်ကို ပြောင်းတော့ အချုပ်ကား အပြာရောင်နဲ့။ ရှေ့နောက် လက်နက်ကိုင် ရဲကားနှစ်စီး ခြံရံလို့ပေါ့။ ရာသီဥတုကလဲ အဲဒီနှစ်က အပူလှိုင်းဖြတ်တဲ့ မေလ။ မိုင် ၉ဝ ကျော် ခရီး ဆိုတော့ မြန်မာပြည်က ကားတွေရဲ့ အိုမင်းမစွမ်းတဲ့အတိုင်း လမ်းမှာ ခဏ နားရတယ်။ ညောင်ပင်သာရွာ တဲ့။ ကျနော်တို့ကို ခေါ်လာတဲ့ အချုပ်ကား ရပ်တယ် ဆိုရင်ပဲ ဈေးရောင်းတဲ့ ကလေးတွေက ကားနားမှာ ဈေးလာရောင်းကြတယ်။ ကျနော်က သူတို့ကို ကြည့်ပြီး ခဏတော့ တွေနေတယ်။ နောက်တော့ ချက်ချင်းဆိုသလိုပဲ ကျနော်က ညီမလေးတို့ တခြားမှာ သွားရောင်းပါလား၊ အကိုတို့မှာ ဝယ်စားဖို့ ပိုက်ဆံ မပါပါဘူး၊ အကိုတို့က ကျောင်းသားတွေပါလို့ ပြောလိုက်တယ်။ အဲ - မကြာပါဘူး သူတို့တွေ လိုက်ပြောလိုက်တာ အနီးအပါးက လူတွေ အကုန် သိသွားပြီး ချက်ချင်း ဝိုင်းအုံလာတယ်။ ပြီးတော့ ကျနော်တို့ကို စားစရာတွေ ပေးတော့တာ ပါပဲ။ တချို့ဆို ဘုန်းကြီး ဆွမ်းကပ်သလို ဖိနပ်ပါ ချွတ်လိုက်ကြသေးတယ်။ ကျနော်ဖြင့် အားနာလိုက်တာ အဲဒီ ဦးလေးကြီးတွေကို။ အဒေါ်ကြီးတွေလဲ လာအားပေးတယ်။ ဒီထက်ပိုပြောရရင် စောစောက ဈေးလာရောင်းတဲ့ ကလေးတွေက သူတို့ဈေးဗန်းလေးတွေထဲက အသီးထုတ်ကလေးတွေ ပေးကြတယ်။ ဘာအသီးလေးတွေလဲ မေးကြည့်တော့ သစ်ချိုသီး တဲ့။ ကျနော့် ဘဝမှာ စားဖူးသမျှ အသီးတွေထဲမှာ အချိုဆုံးပဲ။ နောက်လဲ ဒီထက် ချိုတဲ့အသီး တွေ့ဖူးမယ် မထင်တော့ဘူး။ ဘာလို့လဲဆိုတော့ သူတို့ရဲ့ မေတ္တာတွေကြောင့်။ ဒါကြောင့် ထောင်ထဲက မေတ္တာရှင်တွေကို နိုင်ငံရေး အကျဉ်းသား လွတ်မြောက်ရေး ဆိုတဲ့ သစ်ချိုသီး ကျွေးဖို့ လိုတယ်။ ချုပ်ပြောရင် အဲဒီခရီးမှာ မြင်းခြံထောင်ရောက်တော့ စစ်အုပ်စုရဲ့ လက်ပါးစေတွေက ထုံးစံအတိုင်း ခေါင်းတခုလုံးကို ပုဆိုးနဲ့ထုတ်ပြီး၊ တုတ်တွေနဲ့ ဝိုင်းရိုက် ခေါ်သွားတော့တာပဲ။ တိုက်ခန်းကျဉ်းကျဉ်းတွေဆီကို။ နောက်ရက်တွေမှာလဲ တပတ်လောက် ဆက်တိုက် ပြင်းပြင်း ထန်ထန် ရိုက်တယ်။ ဖိနှိပ်တယ်။ ဒါပေမယ့် ကျနော်တို့က ညောင်ပင်ရွာက ကလေးတွေရဲ့ သစ်ချိုသီးစားပြီး အားရှိနေပြီလေ။ စစ်အုပ်စု ဒီနေရာမှာလဲ အရှုံးပေါ်သွားတယ်။

၊ ၅ ၊

မီးနေသည်ခိုတကောင်
ကိုယ်ငွေ့တွေလွှတ်ထုတ်နေရတာ
အစာရှာချိန်များ အံချော် အိပ်မက်ထဲပြေးမရနိုင်တဲ့အဖြစ်မျိုး
ရိုးတိုးရိတ်တိတ် သစ္စာ ဘယ်မလဲ သူနဲ့လက်ထပ်ဖိတ်စာ ကျေးဇူးရှင်များကို ကျေးဇူးဆပ်ခွင့်ပြုပါ။ မြင်းခြံထောင်မှာ တနှစ်ကျော်ကျော်လောက် ဘယ်သူနဲ့မှ စကားမပြောရဘဲ တယောက်တည်း တိုက်ခန်းထဲမှာ နေရတယ်။ အဲတော့ စကားပြောဖော်တွေက မြေကြီး၊ ကောင်းကင်၊ နံရံနဲ့ ကျေးငှက်တွေပဲ။ အဲဒီထဲမှာ အခန်းနောက်ဖက်က လေဝင်ပေါက်မှာ လာနေတဲ့ ခိုတွေလဲ ပါတယ်။ ခိုတွေ အဲဒီအပေါက်မှာ အသိုက်ဆောက်တယ်။ ဥ အုတယ်။ သားဖွားတယ်။ သူတို့ သားဖွားရက် အစ အဆုံး ကြည့်ဖြစ်တော့ အကောင်ပေါက်ဖို့ဝပ်ရတဲ့ ခိုတကောင်ရဲ့ ဒုက္ခကို တွေ့ရတယ်။ သူ့ခမြာ တခြားခိုတွေလို အစာရှာချိန်မှာ မရှာရ။ ရေစာချိန်မှာ ရေမသောက်ရ။ အိပ်ချိန်မှာမအိပ်ရ။ တာဝန်ချိန် လဲပေးမယ့်သူ မရှိဘူး။ ကြာတော့ ပူလို့ အမွှေးအတောင်တွေတောင် ကျွတ်ထွက်ရှာတယ်။ ဒါပေမယ့် မျိုးဆက်သစ်အကောင်လေး ပေါက်ဖို့ သူ ရဲရဲကြီး ဒုက္ခခံနေတာတွေ့ရတယ်။ နိုင်ငံရေး အကျဉ်းသားတွေကရော။ ဖိနှိပ်ခံထားရတဲ့ ဥခွံ ပေါက်ထွက်ပြီး လွတ်မြောက်ရေး အကောင်သစ်လေး မွေးလာဖို့ ကိုယ်ငွေ့တွေ၊ ကိုယ်ပူတွေ လွှတ်ထုတ်ပြီး ဒုက္ခသစ္စာနဲ့ လက်ထပ်ထားတယ်။ ခင်ဗျား သူတို့ကို ရေတပေါက်လောက် မတိုက်ချင်ဘူးလား။ တိုက်ချင်ရင် နိုင်ငံရေး အကျဉ်းသား လွတ်မြောက်ရေး လှုပ်ရှားမှုမှာ ပါဝင်လိုက်။ တတ်နိုင်ရင် နိုင်ငံရေး အကျဉ်းသားတွေကို ထောင်ဝင်စာမှာ သစ်ချိုသီးထည့်ပေးလိုက်။ နိုင်ငံရေး အကျဉ်းသားဆိုတာ ဘယ်လိုလူမျိုးလဲ။ ကဗျာဆရာအောင်ဝေးရဲ့ ကဗျာနဲ့ ပြောရရင် “လရောင်နဲနဲ ရှိရင်၊ လမ်းနည်းနည်း ဆက်လျှောက်လို့ရတယ်” ဆိုတဲ့ လူမျိုးတွေပဲ။

၁၇ မတ်လ ၂ဝဝ၉

အတောင်ပံနဲ့ မိုးကောင်းကင်ကြား.....

March 13th, 2009

အတောင်ပံနဲ့ မိုးကောင်းကင်နဲ့ ကြား …

ဇွန်မှိုင်း ၊ မတ် ၁၂၊ ၂၀၀၉

(၁)

ကျနော် နိုင်ငံရေး အကျဉ်းသားများ ကူညီ စောင့်ရှောက်ရေးအသင်း (AAPP) ရုံးဝင်းထဲကို ဝင်လိုက်တယ်ဆိုရင်ပဲ သီချင်းသံတွေကို စ ကြားလိုက်ရတယ်။ “အပြင်ကမ္ဘာနဲ့ အဆက်ဖြတ်တဲ့ မြေ… စာအံသံတွေ သုဉ်းဆိတ်စေလည်း ရင်မှာကိုယ်စီရှိတဲ့ အတွေ့အကြုံ… အပြန်အလှန် ဖလှယ်နေရင်း… အချိန်တွေကို စစ်ခင်း… ပညာရှာကာ ဘဝရဲ့ ကျောင်းထဲမှာ …” ဒါ အထဲက သီချင်းပဲ၊ ဘဝတက္ကသိုလ်လို့ နာမည်ပေးထားတဲ့ ကို - - ရေးတဲ့ သီချင်းပဲ၊ ကျနော်တို့ အထဲမှာ တောက်လျှောက် ဆိုခဲ့တဲ့ သီချင်း၊ အခု ဘယ်သူ့အသံပါလိမ့်။ သြော် … ကိုဂျွန်၊ ကိုဂျွန့် အသံပဲ။ သူ့အသံနဲ့ ဒီသီချင်းက တော်တော်လိုက်တာပဲ။ ကျနော် အာရုံစိုက်ပြီး နားထောင်ကြည့်လိုက်တယ်။ ကိုဂျွန့် အသံထဲမှာ ကြေကွဲ ဆို့နင့်မှုတွေ တနင့်တပိုးနဲ့ပါလား။ “သင်ရိုးတခုနဲ့ မကန့်သတ်တဲ့ ဘဝရဲ့ တက္ကသိုလ် … ကြုံတွေ့ရသမျှ တို့အတွက်က သိမှတ်စရာပါ ခေါင်းလောင်းမထိုး ကျောင်းမဆင်းတဲ့ … ဘဝရဲ့ တက္ကသိုလ် စက္ကန့်မလပ် တို့အတွက်က ကျောင်းတက်ချိန်ပါ …” အကျဉ်းထောင်ထဲက သီချင်းတွေကို AAPPက စီဒီထုတ်ပြီး နိုင်ငံတကာကို ဖြန့်ချိမလို့တဲ့။ ကောင်းလိုက်တဲ့ စိတ်ကူး။ ဒီစိတ်ကူးကို ရသွားတဲ့ AAPPကို ကျနော် ကျေးဇူးတင်တယ်။ ဒီသီချင်းတွေဟာ ကျနော်တို့ရဲ့ ဘဝ၊ ကျနော်တို့ရဲ့ ရင်ခုန်သံ၊ ဘယ်လိုမှ တန်ဖိုးဖြတ်လို့ မရနိုင်တဲ့ ကျနော်တို့ရဲ့ အရင်း အနှီးတွေ။

(၂)

ကျနော် AAPPပြခန်းထဲကို ဝင်လိုက်တယ်။ ကင်းသံချောင်းခေါက်သံတွေ ကျနော် ကြားလိုက်ရသလိုပဲ။ အုတ်ရိုး၊ သွတ်ဆူးကြိုး၊ စစ်ခွေးတိုက်၊ ပုံစံခန်း၊ ခြေကျင်းရိုက်သံ၊ ပြီးတော့ အမေနှမ ကိုင်တုတ်နေတဲ့ မကြားဝံ့မနာသာ ဆဲသံတွေ … ကျနော့်နားထဲ၊ ကျနော့် မျက်စေ့ထဲမှာ မြင်ယောင် ကြားယောင်လာတယ်။ ဒီနေရာတွေဟာ ခဏခဏ အမှတ်ရဖို့ ကောင်းတဲ့နေရာတွေ မဟုတ်ဘူး ဆိုပေမယ့် … ဒီနေရာတွေမှာပဲ ကျနော်တို့ ဓားတွေကို ဆေးသားတင်ခဲ့ကြတယ်။ ဒီနေရာတွေမှာပဲ ကျနော်တို့ ယုံကြည်ချက်တွေကို ပိုပြီး ခိုင်မြဲစေခဲ့ကြတယ်။ ဒီနေရာတွေမှာပဲ ကျနော်တို့ရဲ့ ရင်ခုန်သံတွေကို ထုဆစ်ခဲ့ကြတယ်။

(၃)

“နံရံအိုတွေ … အုတ်ရိုး၊ ကင်း … ဗူး၊ ကြိုးစင်တွေ … ရာဇာမင်းလက် … သားကောင်များ ညည်းတွားသံတွေ … သော့အိမ်တွေ အလီလီ အထပ်ထပ် … ကြောက်တတ်သော အပြစ်ရှိသူတွေ …” ကိုအီဗားရဲ့ သီချင်းသံဟာ ကျနော့်အခန်းထဲကို ရောက်လာတယ်။ သူ့အသံဟာ ခါတိုင်းထက် ပိုပြီး ကြေကွဲနေသလိုပဲ။ ရေးလက်စ ကဗျာတပိုင်းတစကို အသာချပြီး ကျနော် သံတခါးဆီ တိုးကပ်ကြည့်လိုက်တယ်။ ကိုအီဗားဟာ တိုက်(၃) အခန်း(၄)ရဲ့ သံတိုင်တွေကို ကျစ်ကျစ်ပါအောင် ဆုပ်ကိုင်ရင်း ဟိုး ခပ်ဝေးဝေးဆီကို ငေးပြီး နောက်တပိုဒ်ကို ဆက်ဆိုတယ်။ “ခြေသံလိုလို တစ္ဆေများလား … ညဝိညာဉ်တွေ … ပြိုပြီ ကျီးတသင်း ကင်းသံချောင်း ‘ကောင်း’ဟစ်သံတွေ … အသိဉာဏ်တွေ သံခြေကျင်းခတ် မကြောက်တတ်သော သတိရှိသူတွေ …” မကြောက်တတ်ဘူး ဆိုတာ သေချာတာပေါ့။ ကိုအီဗားဟာ ဒီသာယာဝတီထောင်ကို ရောက်တာ နှစ်ခေါက်ရှိပြီပဲ။ လွတ်ပြီးလို့မှ ဘာမှမကြာခင် နောက်တခေါက်အတွက် သူ အဆင်သင့်ဖြစ်ခဲ့တယ်။ နည်းနည်းလေးမှ နောက်မတွန့်ခဲ့ဘူး။ ကျနော်တို့အခန်းကနေ ၅ ဗူးကို လှမ်းတွေ့ရတယ်။ (၅) ဗူးပေါ်က မီးမောင်းဟာ ကျနော်တို့ (၃/၄) တိုက်ဝင်း၊ (၁/၂) တိုက်ဝင်း၊ (၁)ဆောင်နှင့် ဖိုကြီးအစပ်ဆီကို လှမ်းထိုးလိုက်တယ်။ ဆက်တိုက်နီးပါးမှာပဲ (၈) နာရီ သံချောင်းခေါက်သံတွေ ဗူးစင်တိုင်း က ထွက်လာတယ်။ ဗာယာတွေရဲ့ တုံးခေါက်သံ၊ အဆောင်တွေဆီက “အားလုံးကောင်းပါတယ် ဆရာကြီး”ဆိုတဲ့ သတင်းပို့သံတွေ ဆက်တိုက် ထွက်လာတယ်။ ဘာတွေ အားလုံးကောင်းနေကြတာလဲ။ မနက်ပိုင်းကတင် Dictionary ထောင်ဝင်စာက သွင်းခွင့်ပြုဖို့ ထောင်ပိုင်ကြီးကို တင်ပြခဲ့တဲ့ စက်မှုတက္ကသိုလ်ကျောင်းသား ကိုစိုးထွန်းကို ရိုက်ချင်တိုင်းရိုက်၊ ထိုးကြိတ်ချင်တိုင်း ထိုးကြိတ်ပြီး ကြိုးတိုက်ထဲကို ပို့လိုက်သေးတာပဲ။ ကြိုးတိုက်မှာ စောင်မပါ၊ အဝတ်အပိုမပါနဲ့ တယောက်ထဲ ခွဲပြီး ပြစ်ဒဏ်အဖြစ် ချုပ်နှောင်ထားပြီးတဲ့ အထိတောင် အားလုံး ဘာတွေ ကောင်းနေကြသေးတာလဲ။ ကျနော် စဉ်းစားမရဘူး။ အဲဒီအချိန်မှာပဲ ဘေးအခန်းက (၁ဝ)တန်းကျောင်းသားလေး ဟန်ဝင်းအောင်ရဲ့ တောက်ခေါက်သံကို ကြားလိုက်ရတယ်။ “အကောင်းဆုံးသော မျှော်လင့်ချက် … အနာဂတ်အတွက် ဖြစ်စေ … အဆိုးဝါးဆုံး ဒဏ်ဆူးချက် လူတချို့ ပြည့်နှက်ကာ နေ … ရွှေပြည်ကို လှမ်းဆက်ခရီးမှာလေ” ကိုအီဗားရဲ့ သီချင်းသံဟာ အုတ်ရိုးတွေကို ကျော်ပြီး အပြင်က လယ်ကွင်းတွေကို ကျော်ပြီး ကျနော်တို့ကို ငေးကြည့်နေတဲ့ ရိုးမတွေဆီထိ ရောက်သွားပြီလား။

(၄)

ဘိုကလေး မုန်တိုင်းစစ်ဆင်ရေးမှာ အဖမ်းခံရပြီး (၁၇)နှစ် ကျခံလာရတဲ့ ကရင်လယ်သမားလေး စောတာအယ် ကို ကျနော် တောင်ယာထဲမှာ လှမ်းတွေ့ရတယ်။ ကြက်ဟင်းခါးစင်ကလေး ဘေးမှာ တလှုပ်လှုပ်နဲ့ ဝါးခြမ်းပြားတခုကို အသေအချာ အချောသတ်နေတယ်။ သူ့ဘေးမှာက တောင်ယာ တူးရင်း ဆွရင်း ကောက်ရတဲ့ သံပြားအစအနလေးတွေကို ကြံဖန်ပြီးလုပ်ထားတဲ့ ဓါးတလက်ရယ်၊ ဆူးလေး နှစ်ချောင်း ရယ်၊ ပုလင်းကွဲ သုံးလေးစရယ်။ “ဟေ့လူ … ဘာလုပ်မလို့လဲ သဲကြီးမဲကြီး” သူက သူ့ပါးစပ်ကို လက်ညိုးလေး အသာကပ်ပြီး ခပ်ပြုံးပြုံးမျက်နှာထားနဲ့ “ရှူး … တိုးတိုး အကို၊ ဂစ်တာလုပ်မလို့” “ဟာ ဟုတ်လှချည်လား၊ စိတ်ကူးကောင်းလှချည်လား၊ ကြိုးက ဘယ်လိုလုပ်မလဲ” “နိုင်လွန်ကြိုးလေ အကိုရ၊ ကြည့်နေပါ၊ ညနေကျရင် အကိုတွေ့မယ်” စောတာအယ်ရဲ့ အပြုံးက တကယ်ကို ချစ်စရာပါ။ ကလေးတယောက် ရွှံဗွက်ထဲမှာ ထိုင်ပြီး လွတ်လွတ်လပ်လပ် ဆော့ခွင့်ရနေတဲ့ ပုံစံမျိုး။ တကယ်ကို ကြည်ကြည်နူးနူး။ ညနေကျတော့ ကျနော် ထောင်တွင်းဖြစ် ဂစ်တာကို မြင်ရပြီ၊ ထောင်ဝင်စာက ရေထည့်ဖို့ သွင်းထားတဲ့ မိုလာပုံးကို ဂစ်တာ အိုးလုပ်၊ သူ မနက်က အချောသတ်နေတဲ့ ဝါးခြမ်းပြားက ဂစ်တာဖလက်တန်ဖြစ်၊ သူ့ သူငယ်ချင်းတွေ မနက်က အလုပ်ရှုပ်နေတဲ့ နိုင်လွန်ချည် တခင်က ဂစ်တာကြိုးတွေဖြစ်၊ ‘တစ်’ ကြိုး၊ ‘နှစ်’ ကြိုး၊ ‘သုံး’ ကြိုး … ဂစ်တာတလုံးက လိဒ်တီးဖို့တဲ့၊ နောက်တလုံးက ရစ်သမ်တီးဖို့တဲ့၊ သူတို့ ဂစ်တာကို သူတို့ ကျေကျေနပ်နပ်ကြီး တီးခတ် နေကြပုံများ မြင်ရသူတိုင်း အပျော်မကူးပဲ မနေနိုင်ဘူး။

(၅)

အခန်းရဲ့ အလယ်မှာ စားပွဲပုပုလေးတလုံး၊ အဲဒီစားပွဲပေါ်ကို အနီရောင် စောင်တထည်နဲ့ ကျကျနန လေးဘက်လေးတန်ရော၊ အပေါ်ဘက်ရော ပတ်လိုက်တဲ့အခါ အနီရောင် လေးထောင့်အတုံးလေး တတုံးဖြစ်သွားတယ်။ အဲဒီ အနီရောင်အတုံးပေါ်မှာ အနက်ရောင် ခပ်ထူထူ အထည်စတခုကို စနစ်တကျ ခေါက်တင်လိုက်ပြီး အဲဒီအနက်ရောင်ပေါ်မှာတော့ အနီရောင် ကစ္စမီကွစ်ခ်ပန်းကလေးတွေကို ကြယ်ပုံသဏ္ဍာန် ဖော်လိုက်တယ်။ ပိန်းပိတ်နေအောင် မဲနက်နေတဲ့ အမှောင်တိုက်ထဲက ကြယ်နီတပွင့်ဖြစ်သွားတယ်။ အဲဒီကြယ်ရဲ့ ပတ်ပတ်လည်မှာက ဖယောင်းတိုင် (၁၃)တိုင်။ ဖယောင်းတိုင်တွေကို မီးထွန်းညှိပြီးတဲ့ အချိန်မှာတော့ ဒီစားပွဲလေးကို ကျနော်တို့ အားလုံး ဝိုင်းလိုက်ကြတယ်။ ၁၂ ပေ ၈ ပေ အခန်းထဲမှာ လူ (၃ဝ) နီးပါး။ “ရဲဘော် ကိုဖုန်းမော်နှင့်တကွ ဒီမိုကရေစီတိုက်ပွဲ အဆက်ဆက်တွင် ကျဆုံးခဲ့ရသော ရဟန်းရှင်လူ ကျောင်းသား ပြည်သူ အပေါင်းတို့အား အလေးပြု” ထောင်မှူး ဒါမှမဟုတ် တာဝန်မှူး တယောက်ယောက် လာရင် အချိန်မီ သတိပေးနိုင်ဖို့ အပြင်မှာ တယောက်၊ ဂိတ်တခါး နားမှာ တယောက် ကင်းချထားတယ်။ အလေးပြုပြီး မကြာခင်မှာ “ကမ္ဘာမကြေဘူး … ငါတို့သွေးနဲ့ ရေးခဲ့ကြတဲ့ မော်ကွန်းတေး တော်လှန်ရေး ဒီမိုကရေစီတိုက်ပွဲအတွင်းမှာ ကျဆုံးသော အို သူရဲကောင်းတို့ရေ … အာဇာနည်တွေ နေတဲ့တိုင်းပြည်…” ကမ္ဘာမကြေ မျိုးဆက်သစ် သီချင်းကို စ ဆိုတယ်။ ရဲဘော် နှစ်ယောက်က မနေ့က စောတာအယ် လုပ်ပေးတဲ့ ဂစ်တာ နှစ်လက်ကို တီးခတ်ကြတယ်။ ပြီးတော့ လှောင်ချိုင့်ထဲက တေး၊ ၅ည သံစဉ်၊ ချယ်ရီ သို့မဟုတ် ရနံ့မဲ့ ခရီးရှည်၊ နိုင်ငံတော် ငိုချင်း၊ ရှစ်ရက် ရှစ်လ ရှစ်ဆယ့်ရှစ်၊ ဒီနံရံတွေကြား နှင့် ဘဝတက္ကသိုလ် စတဲ့ သီချင်းတွေ တောက်လျှောက်ဆိုကြတယ်။ ဒီနေ့ဟာ “မြန်မာနိုင်ငံလူ့အခွင့်အရေးနေ့” “ကိုဖုန်းမော်နေ့”၊ မတ်လ (၁၃)ရက်နေ့လေ။ အကျဉ်းထောင်ရဲ့ အကြပ်တည်းဆုံးနေ့ရက်များမှာတောင် အောက်မေ့ဖွယ်နေ့တွေကို ကျနော်တို့ ဖြစ်အောင် ကျင်းပခဲ့ကြတယ်။

(၆)

ကျနော် ကဗျာတပုဒ်ပြီးသွားတိုင်း ဆရာပွင့်ကို ပြကြည့်တယ်။ “ဆရာ ကျနော့်ဟာ ကဗျာရော ဖြစ်ရဲ့လား ဆရာ” အဲဒီလို ကျနော်မေးတိုင်း ဆရာက “ဖြစ်ပြီလားဗျာ၊ ဒီလောက် ဘယ်နေရာကြည့်ကြည့် လွမ်းစရာတွေ ချည်းဖြစ်နေတဲ့ နေရာမှာ ကျနော်တို့ရင်ထဲက အရာတွေကိုသာချရေး၊ ဘာရေးရေး ကဗျာ ပေါ့ဗျာ” လို့ ဆရာက အမြဲပြောတယ်။ ဆရာပြောတာလည်း ဟုတ်တာပဲလေ၊ ကျနော်တို့အထဲက ဘဝတွေကိုပဲ ကြည့်ကြည့်၊ အပြင်မှာ ကျန်ခဲ့တဲ့ ဘဝတွေကိုပဲ လှမ်းကြည့်ကြည့် အရာရာဟာ ရင်နှင့် ရင်းနှီးခဲ့ကြရတာတွေချည်းပဲ။ အုတ်နီခဲကျိုးကို ချွန်နေအောင်သွေးထားပြီး သမန်တလင်းပေါ်မှာ ရင်ထဲက ခံစားချက်တွေ တလုံးချင်း ရေးချ၊ ကဗျာ တပါဒလောက် ဖြစ်သွားပြီဆိုရင် အဲဒါကို အလွတ်ကျက်၊ ဘာကြောင့်လဲဆိုတော့ ၁၂ ပေ ၈ ပေ အခန်းထဲမှာ လူက (၅) ယောက်လောက်ထည့်ထားတာ ဆိုတော့ သမန်တလင်း လက်ကျန်ဆိုတာကိုက သိပ်မှ မကျန်တော့တာဘဲ။ အဲဒီလို ရေးလိုက် ကျက်လိုက် ပြန်ဖျက်လိုက် အသစ်ထပ်ရေးလိုက်နဲ့ ကဗျာတပုဒ် အပီအသ ဖြစ်သွားပြီ ဆိုတဲ့အခါကျမှ ပလပ်စတစ် အကြည်သားကို နံရံပေါ် ကပ်တင်ပြီး သံချွန်သေးသေးလေးနဲ့ ဒါမှမဟုတ် ဒုတ်အချွန် သေးသေးလေးနဲ့ ဖိပြီး ရေးကြရ တာ။ အဲဒီလိုရေးပြီးသွားတဲ့ ကဗျာကိုမှ ဟိုအခန်း ဒီအခန်း ပြကြ၊ ဖတ်ကြ၊ ဝေမျှ ခံစားကြ။ အခွင့်အလမ်းကောင်းလေး ကံကောင်းထောက်မလို့ ရကြရင်၊ ဟိုတိုက် ဒီတိုက်အထိ လှမ်းဖြန့်ကြ၊ အပြန်အလှန်ခံစား ကြ၊ အပြန်အလှန် ဝေဖန်အကြံပြုကြ။ အဲဒီ ကဗျာတွေကနေ ဂီတ သံစဉ်တွေနဲ့ တွေ့သွားကြတဲ့အခါ သီချင်းတွေ ဖြစ်လာတယ်။ စစ်အုပ်စုဟာ တိုင်းပြည်ရဲ့ အညွန့်အဖူးတွေကို စစ်ဖိနပ်နဲ့ နင်းချေတယ်။ သူ့ရည်ရွယ်ချက်က တစစီ ကြေမွ ပျက်သုန်း သွားစေချင်တယ်။ ကျနော်တို့ရဲ့ တိုင်းချစ်ပြည်ချစ်စိတ်တွေကို အမြစ်က ဆွဲနှုတ်ပစ်လိုက်သလို တစမကျန် ဖျက်သိမ်းပစ်ချင်တယ်။ ဒါပေမယ့် ဒါနဲ့ ပြောင်းပြန်ပဲ။ သူက ဖျက်သိမ်းပစ်ဖို့ ကြိုးစားလေလေ ပိုပြီးရှင်သန် ခိုင်မာလာလေလေပဲ။ သံပူပူမှာ အားစိုက်ထုနှက်လိုက်သလို သံမဏိသား တနေ့တခြားတက်လာတယ်။ မီးဆေးလိုက်တဲ့ ဓါးလို ဆေးသားတွေ တထပ်ပြီး တထပ် တက်လာတယ်။ ရန်သူ့ရဲ့ အထုအနှက်ကို ခံလိုက်ရတိုင်း ကဗျာတွေ ထွက်ကျလာ၊ သံစဉ်တွေ ထွက်ကျလာ၊ အဲဒီကမှတဆင့် တော်လှန်ရေး တေးသီချင်းတွေ ထွက်ကျလာတယ်။ ဒီလိုနဲ့ နှစ်တွေကြာလာတာနဲ့အမျှ ကဗျာတွေ တပုဒ်ပြီး တပုဒ်၊ သီချင်းတွေ တပုဒ်ပြီး တပုဒ် … ။

(၇)

အထဲမှာ အောက်မေ့ဖွယ် အခမ်းအနားတွေ တခု လုပ်တိုင်း လုပ်တိုင်း ကျနော့် ရင်ထဲမှာ အမြဲဖြစ်နေတဲ့ တောင့်တမှု တခုက ဗီဒီယိုမှတ်တမ်း ရိုက်ထားချင်တဲ့ ကိစ္စပဲ။ “ဆရာရယ် ဗီဒီယိုနဲ့ မှတ်တမ်းတင်ထားပြီး အပြင်က ရဲဘော်တွေ၊ နိုင်ငံတကာက ရဲဘော်တွေကို ပေးပြရရင် သိပ်ကောင်းမှာပဲနော်” လို့ ကျနော်က တမ်းတမ်းတတ ပြောမိတဲ့အခါတိုင်း ဆရာပွင့်ဟာ ကျနော်ကို ငေးငေးကြီး စိုက်ကြည့်နေတတ်တယ်။ အဲဒီအချိန်မျိုးမှာ သူ့မျက်ဝန်းတွေက အလွမ်းတွေနဲ့ စိုစွတ်လို့။ ပြီးတော့ ဆရာက လေးလေးကြီးနဲ့ “ဒါတွေဟာ တကယ့် သမိုင်းတွေပါဗျာ”တဲ့၊ သူ ခပ်ဆွေးဆွေးကြီးပြောပြီး ကျနော့်လက်ကို တနွေးတထွေး ဆုပ်ကိုင်ထားတတ်တယ်။

(၈)

အခုတော့ ကျနော် အနှစ်နှစ် အလလ က မက်ခဲ့ရတဲ့ အိမ်မက်တွေကို AAPPက အကောင်အထည်ဖော်လိုက်ပါပြီ။ “အတောင်ပံနဲ့ မိုးကောင်ကင်ရဲ့ကြား လှောင်ချိုင့်များရှိသရွေ့ … မိုးနဲ့ တို့နဲ့ မတွေ့ … မပျံနိုင်တဲ့ ငှက်ကလေး အာကာသ ဟင်းလင်းပြင်နဲ့ ဝေး … အတောင်ပံရှိရက်နဲ့ လွတ်လပ်ရေးမရလို့ မပျံနိုင်တဲ့ ငှက်ကလေး …” အဆိုရှင် လင်းလင်းရဲ့ အသံကို ကျနော် ကြားနေရတယ်။ လင်းလင်းကလည်း အဆိုကောင်းမှကောင်း။ သီချင်းနံမည်က “လှောင်ချိုင့်ထဲက တေး”တဲ့၊ ကိုနေဝန်းနီ ရဲ့ လက်ရာ။ မကြာခင် ကမ္ဘာအနှံ့ ပျံသန်းထွက်ခွာတော့မှာ ဆိုတဲ့ အသိဟာ ကျနော့် ရင်ကို တလှပ်လှပ်ခုန်စေခဲ့တယ် ဆိုတာ အထဲမှာ ကျန်ရစ်ခဲ့ကြတဲ့ ကျနော့် ညီအကို မောင်နှမတွေ အသေအချာသိနိုင်ကြမှာပါ။ ။ လှောင်ချိုင့်ထဲက ငှက်ငယ်များ အမြန်ဆုံးလွတ်မြောက်နိုင်ပါစေ။

(၂၃၊ ဖေဖော်ဝါရီ ၂ဝဝ၆။)

နိုင်ငံရေးအကျဉ်းသား ကိုဇာဂနာ ခဲဆိပ်သင့် ဝေဒနာ ခံစားနေရ

NEJ / မတ်လ(၁၉) ရက်၊ ၂၀၀၉
မြစ်ကြီးနားထောင်တွင် နှစ်ရှည်ထောင်ဒဏ်ကျခံနေရသည့် သရုပ်ဆောင် ဒါရိုက်တာ မောင်သူရခေါ် လူရွှင်တော်ဇာဂနာသည် ထောင်တွင်း၌ ခဲဓာတ်ပါသည့်ရေကို သောက်သုံးနေရပြီး ခဲဆိပ်သင့်ဝေဒနာ ခံစားနေရကြောင်း မတ်လ (၁၁) ရက်က ထောင်ဝင်စာသွားတွေ့သည့် ခယ်မ မငြိမ်းက ပြောဆိုသည်ဟု မိသားစုဝင်တဦးက ပြောသည်။

၎င်းက “မငြိမ်းက မြစ်ကြီးနားကို (၁၁) ရက်နေ့မှာ သွားတယ်။ (၁၁) ရက်နေ့မှာပဲ ထောင်ဝင်စာတွေ့ခွင့်ရတယ်။ ယူသွားတဲ့ ဂျာနယ်တွေ၊ စာအုပ်စာတမ်းတွေကိုလည်း ပေးခွင့်ရတယ်။ အသားမည်းလာတာကလွဲရင် ကိုသူရ ကျန်းမာရေး ကောင်းတယ်။ ဒါပေမယ့် ထောင်ထဲမှာ ခဲဓာတ်ပါတဲ့ရေကို နေ့စဉ်သောက်နေရတော့ ခဲဆိပ်သင့်တဲ့ ဝေဒနာတမျိုး ခံစားနေရတယ်လို့ ကိုသူရက ပြောတာ မငြိမ်းက ပြန်ပြောတယ်” ဟု ပြောသည်။

၎င်းတို့ မိသားစုဝင်များအနေဖြင့် ခဲဓာတ်ပါသည့်ရေကို သောက်သုံးပြီးနောက် ဖြစ်သည့် ခဲဆိပ်သင့်ဝေဒနာ ဆိုသည်ကို သိပ်နားမလည်ကြောင်း၊ ထို့ကြောင့် ကိုသူရအား မည်သို့ လုပ်ကိုင်ပေးရမည်ဆိုသည်ကို နားလည်သည့် ဆရာဝန်ကြီးများကို ပြောပြအကူအညီတောင်းထားကြောင်းလည်း ပြောသည်။

နှစ်ရှည်ထောင်ဒဏ်ကျခံရပြီး မကြာသေးခင်ကမှ မြစ်ကြီးနားထောင်က ပြန်လွတ်လာသည့် ဒေါက်တာ ဇော်မြင့်မောင်သည်လည်း အဆိုပါ ခဲဓာတ်ပါသည့် ရေကို နှစ်ပေါင်းများစွာ သောက်သုံးခဲ့၍ ကျန်းမာရေး ထိခိုက်ခဲ့ရကြောင်း သိရသည်။

မြစ်ကြီးနားထောင်တွင် ထောင်ကျနေသည့် ကိုသူရကို အစ်ကိုဖြစ်သူ ကိုတေဇက ပြီးခဲ့သည့် မတ်လ (၃) ရက်က ထောင်ဝင်စာသွားတွေ့ခဲ့သော်လည်း တွေ့ခွင့်မရကြောင်း၊ အကျဉ်းထောင်အာဏာပိုင်များက ကိုသူရသည် အမှတ် (၅၄) ရှမ်းကုန်းလမ်း၊ စမ်းချောင်းတွင် နေထိုင်သူဖြစ်ပြီး အဆိုပါနေအိမ်၌ ဖမ်းဆီးခဲ့၍ ယင်းနေအိမ် အိမ်ထောင်စုဇယားပါ မိသားစုဝင်မှသာ တွေ့ဆုံခွင့်ရမည့်အကြောင်း ပြောသည်ဟု သိရသည်။

ယခုအချိန်၌ ကိုသူရ၏ မိခင်ကြီး ဒေါ်ကြည်ဦး အသည်းအသန် မကျန်းမမာ ဖြစ်နေပြီး ဆေးရုံမှ အိမ်သို့ ပြန်လည် ခေါ်ထားရသည့်အတွက် မိခင်ကြီး၏ ကျန်းမာရေး နောက်ဆုံးအချိန် ကိုသူရနှင့် တွေ့ခွင့်ရရန် သက်ဆိုင်ရာ အာဏာပိုင်များထံ တင်ပြတောင်းဆိုထားကြောင်း မိသားစုဝင်တဦးက ပြောသည်။

အင်းစိန်ထောင်မှလွဲ၍ မြန်မာနိုင်ငံအနှံ့က စစ်အစိုးရအကျဉ်းထောင်များ သောက်ရေသန့် သောက်သုံးသည့် အလေ့အထမရှိဘဲ ထောင်တွင်းတူးဖော်ထားသည့် ရေတွင်းများမှ ရေကိုသာ သောက်သုံးလေ့ရှိသည်။ အကျဉ်း ထောင်အများစုကို မြန်မာနိုင်ငံအား ဗြိတိသျှ အစိုးရ အုပ်ချုပ်ခဲ့စဉ်က တည်ဆောက်ခဲ့ခြင်းဖြစ်ပြီး အကျဉ်းသားများ သောက်သုံးသည့်ရေထဲတွင် ခဲဓာတ်ပါဝင်သည်ဟု ကျယ်ကျယ်ပြန့်ပြန့် သတင်းဖြစ်ပေါ်ခဲ့သော်လည်း အစိုးရ တာဝန်ရှိသူများက စစ်ဆေးခြင်း၊ ကျန်းမာရေးနှင့်ညီမညီ၊ သောက်သုံးရန် သင့်မသင့် စသဖြင့် သတင်းထုတ်ပြန်ခြင်း မျိုးလည်း မရှိဘူးဟု အကျဉ်းဦးစီးဌာန အရာရှိတဦးက ပြောသည်။

ကိုသူရခေါ် ဇာဂနာသည် နာဂစ်မုန်တိုင်းဒဏ်ခံ ပြည်သူများကို ကယ်ဆယ်ရေး လုပ်ခဲ့ခြင်းကြောင့် စစ်အစိုးရက အခြားသော ပုဒ်မများ တပ်ပြီး ထောင်ဒဏ် (၅၉) နှစ် ချမှတ်ထားခဲ့ခြင်း ဖြစ်သည်။ နောက်ပိုင်း အယူခံဝင်သည့် အတွက် ထောင်ဒဏ် (၂၄) နှစ် လျှော့ချခံရပြီး လက်ရှိ ထောင်ဒဏ် (၃၅) နှစ်ဖြင့် မြစ်ကြီးနားအကျဉ်းထောင်တွင် အကျဉ်းကျခံနေရခြင်းဖြစ်သည်။