သန်းထိုက်ဦး
တနင်္လာနေ့၊ သြဂုတ်လ 25 2008 21:56 - မြန်မာစံတော်ချိန်
ချင်းမိုင်။ ။ ရွှေဝါရောင် တော်လှန်ရေး နှစ်ပတ်လည်နေ့ မတိုင်မီ နိုင်ငံရေး အကျဉ်းသား အားလုံး ပြန်လွှတ်ပေးရန် ရခိုင်ပြည်နယ် တောင်ကုတ်မြို့ အမျိုးသား ဒီမိုကရေစီအဖွဲ့ချုပ်က နအဖ စစ်အစိုးရအား ယခုလ ၂၃ ရက်နေ့က တောင်းဆိုသည်။
ဥပဒေမဲ့ ဖမ်းဆီးထားသော နိုင်ငံရေး အကျဉ်းသားများ၊ ကျောင်းသား ခေါင်းဆောင်များ အပါအဝင် ပြီးခဲ့သည် ၂ဝဝ၇ ခုနှစ် ရွှေဝါရောင် တော်လှန်ရေး ဖြစ်ပွားခဲ့သည့် စက်တင်ဘာလ ၂၄ ရက်နေ့ မတိုင်ခင် အမြန်ဆုံး ချွင်းချက်မရှိ ပြန်လွှတ်ပေးရန်အတွက် ကျေညာချက်တရပ် ထုတ်ပြန်ကာ နအဖ စစ်အစိုးရအား တောင်းဆိုလိုက်ခြင်း ဖြစ်သည်။
“ရွှေဝါရောင် တော်လှန်ရေး နှစ်ပတ်လည်နေ့မှာ ကျနော်တို့ ထုတ်ပြန်ချက်မှာ ပါတဲ့အတိုင်း နအဖ ဘက်က မလိုက်ရောရင် ရှေ့ဆက်ပြီးတော့ နည်းမျိုးစုံနဲ့ ကျနော်တို့ ဆက်လုပ်သွားမယ်။ ကျနော်တို့က အခု သူတို့ကို (နအဖ) ပထမ ငြိမ်းငြိမ်းချမ်းချမ်းနဲ့ပဲ တောင်းဆိုသွားမယ်။ သူတို့ဘက်က ဒီအတိုင်း မလိုက်ရောခဲ့ရင်တော့ လုပ်မှာပဲဗျာ” ဟု တောင်ကုတ် အမျိုးသားဒီမိုကရေစီ အဖွဲ့ချုပ် စည်းရုံးရေး အဖွဲ့ဝင် ကိုဗလကြီးက မဇ္ဈိမကို ပြောသည်။
မလိုက်လျောပါက မည်ကဲ့သို့ လုပ်ဆောင်သွားမည်ကိုမူ သူက အသေးစိတ် ပြောဆိုခြင်း မရှိပါ။
ယခုလသြဂုတ်လ ၈ ရက်နေ့တွင် ကျရောက်သည့် နှစ် ၂ဝ ပြည့် ရှစ်လေးလုံးနေ့ လူထုအရေးတော်ပုံ အထိမ်းအမှတ်အဖြစ် တောင်ကုတ်မြို့တွင် ဆန္ဒပြသူ လူငယ် ၄၈ ဦးအား အာဏာပိုင်များက ဖမ်းဆီးက ည ၉ နာရီခန့်တွင် ၄၃ ဦးအား ပြန်လွှတ်ပေးခဲ့သော်လည်း ၅ ဦးကိုမူ ဆက်လက် ဖမ်းဆီးခဲ့သည်။
အာဏာပိုင်များက လမ်းလျှောက် ဆန္ဒပြသူများသည် ဥပဒေနှင့် ဆန့်ကျင်သည့် လူစုလူဝေးတွင် ပါဝင်မှုနှင့် နိုင်ငံတော်ဆူပူစေရန် လှုံ့ဆော်မှုတို့ဖြင့် သံတွဲထောင်တွင် တဦးလျှင် ထောင်ဒဏ် ၂ နှစ်ခွဲစီ စီရင်ချက် ချမှတ်ခဲ့ပြီးနောက် ယခုလို တောင်းဆိုချက်များ ပေါ်ထွက်လာခြင်းလည်း ဖြစ်သည်။
ယခုအခါ တောင်ကုတ်မြို့တွင် လုံခြုံရေးတပ်ဖွဲ့ဝင်များသည် လက်ဖက်ရည်ဆိုင်များ၌ အရပ်ဝတ်များဖြင့် လေ့လာ အကဲခတ်နေသလို၊ ပြည်နယ်မြို့တော် စစ်တွေရှိ လောကနန္ဒာဘုရား၊ ဘုရားကြီး၊ ဦးဥတ္တမပန်းခြံ၊ ဘုန်းကြီးကျောင်းများ စသည့်နေရာများတွင် စစ်တပ်လုံခြုံရေး တပ်သားများ ချထားသည်ဟု ရခိုင်အမျိုးသား ဒီမိုကရေစီအဖွဲ့ချုပ် တွဲဖက်အတွင်းရေးမှူး ဦးသိန်းလှိုင်က ပြောပြသည်။
“သူတို့က အဲဒီမှာ လုံခြုံရေးချတာ။ သံဃာတော်တွေရဲ့ စက်တင်ဘာ နှစ်ပတ်လည်နေ့ကို ကြောက်ပြီးတော့ လုံခြုံရေး ချထားတယ်လို့ ထင်တယ်” ဟု သူက ပြောသည်။
Subscribe to:
Post Comments (Atom)
No comments:
Post a Comment