ဝရမ်း ထုတ်ခံရသူ နိုင်ငံရေး ရှေ့နေ ထိုင်းနယ်စပ်သို့ တိမ်းရှောင်

သန်းထိုက်ဦး

တနင်္လာနေ့၊ ဒီဇင်ဘာလ 15 2008 20:16 - မြန်မာစံတော်ချိန်

ချင်းမိုင် (မဇ္ဈိမ)။ ။ နိုင်ငံရေးဆိုင်ရာ အမှုများကို လိုက်ပါဆောင်ရွက်ပေးရင်းက စစ်အစိုးရ၏ ဖမ်းဝရမ်းထုတ်ခံခဲ့ရသူ လူငယ် ရှေ့နေ စောကျော်ကျော်မင်းသည် ထိုင်း - မြန်မာ နယ်စပ်သို့ ထွက်ပြေးတိမ်းရှောင် ရောက်ရှိလာသည်။ စောကျော်ကျော်မင်းအား ရန်ကုန် မြောက်ပိုင်း ခရိုင် တရားရုံးက တရားစီရင်ရေးကို အနှောက်အယှက် ပြုသည်ဟု ဆိုကာ အောက်တိုဘာ ၃၀ ရက်နေ့တွင် ထောင်ဒဏ် ၆ လ ချမှတ်ခဲ့ပြီးနောက် ထွက်ပြေး တိမ်းရှောင်နေခဲ့သည်။ "တရား စီရင်ရေး စနစ်မှာ ထောင်ကျခံလိုက်မယ် ဆိုလို့ရှိရင် ကျနော့်အနေနဲ့ လုပ်ကိုင်ဆောင်ရွက်နိုင်ခြင်း မရှိတော့ဘူးပေါ့။ ဒီဘက် ရောက်လာတယ်ဆိုရင် ဘာပဲပြောပြော အနည်းအကျဉ်းတော့ လိုက်ကိုင်ဆောင်ရွက်လို့ ရမယ်ဆိုတဲ့ ယုံကြည်ချက်နဲ့ ရောက်လာခြင်း ဖြစ်ပါတယ် " ဟု အသက် ၂၉ နှစ်အရွယ် စောကျော်ကျော်မင်းက မဇ္ဈိမကို ပြောသည်။ ကုန်ဈေးနှုန်း ကျဆင်းရေးအတွက် အစိုးရအနေဖြင့် လုပ်ဆောင်ရန် တောင်းဆိုဆန္ဒပြခဲ့သူ အမျိုးသား ဒီမိုကရေစီအဖွဲ့ချုပ်၏ လှိုင်သာယာမြို့နယ်အဖွဲ့ဝင် ကိုသန့်ဇင်မျိုးပါ ၁၁ ဦး၏ အမှုကို ခုခံလျှောက်လဲပေးနေစဉ် တရားရုံးတော်ကို မထီမဲ့မြင်ပြုမှုဖြင့် ပြစ်ဒဏ်ချမှတ်ခံရခြင်းဖြစ်သည်။ အမှုစစ်နေစဉ် တရားခံများက ကျောခိုင်းထိုင်နေသည်ကို ရှေ့နေများကတဆင့် ပြောခိုင်းရာ တရားခွင်တွင် အမှုသည်များ စိတ်တိုင်းကျနေနိုင်သည်ဟု ပြန်ပြောသည့်အတွက် ပြစ်ဒဏ် ချမှတ်လိုက်ခြင်း ဖြစ်သည်။ "ကာယကံရှင် အမှုသည်တွေ ကိုယ်တိုင်က ပြုမှုလုပ်ဆောင်နေတဲ့ အတွက် ကျနော်တို့ အနေနဲ့ ဘာမှ ၀င်ရောက်ပြောဆိုခွင့် မရှိဘူးလို ပြောလိုက်တာတင် အဲဒီလိုပြောတာကို အခြေခံပြီးတော့ ကျနော်တို့ကို မြောက်ပိုင်း ခရိုင် တရားရုံးက လှိုင်သာယာမြို့နယ် တရားသူကြီးက တရားလိုလုပ်ပြီးတော့ တရားစွဲတာ ဖြစ်ပါတယ် " ဟု စောကျော်ကျော်မင်းက ပြောသည်။ သူနှင့်အတူ တရားဆိုင်များအတွက် ရှေ့နေလိုက်ပါပေးနေသူ ကိုညီညီထွေးကတော့ ထောင်ကျခံသွားရသည်။ ရှေ့နေများအတွက် အမိန့်ချမှတ်မည့် တရားခွင်သို့ စောကျော်ကျော်မင်းက မတက်ရောက်ဘဲ တိမ်းရှောင်သွားခဲ့ခြင်း ဖြစ်သည်။ သူတို့၏ အမှုသည်များလည်း အနည်းဆုံး ထောင်ဒဏ် ၇ နှစ်ခွဲ ချမှတ်ခံခဲ့ရသည်။ စောကျော်ကျော်မင်းသည် စစ်အစိုးရက စွဲဆိုထားသော အတိုက်အခံ နိုင်ငံရေးအမှုသည် ၂၀ ခန့်အတွက် လိုက်ပါ ဆောင်ရွက်ပေးခဲ့သူ ဖြစ်သည်။ စစ်အစိုးရ မျက်မုန်းကျိုး အပြစ်ပေးခံရသော အခြားသော အတိုက်အခံ ရှေ့နေနှစ်ဦးမှာ ဦးအောင်သိန်းနှင့် ဦးခင်မောင်ရှိန်တို့ဖြစ်ပြီး အလားတူ စွဲချက်များဖြင့် ထောင်ဒဏ် ၄ လ စီ ချမှတ်ခံခဲ့ရပြီး နယ်ထောင်များတွင် ကျခံနေရသည်။