သား (၃) သားနဲ့ တိုင်းရင်းသားပြည်သူများ လက်တွဲကြ
ဆောင်းပါးရှင် - တရုတ်မ (တပ်မတော် အရာရှိတစ်ဦး)
တပ်မတော် အရာရှိ တစ်ဦးဟာ သူ့အပတ်စဉ်က လူတွေ ခေါ်ကြတဲ့ Nickname “တရုတ်မ” ကလောင်နံမည်နဲ့ ကျွန်တော် ကိုဖိုးတရုတ်ထံသို့ ဆောင်းပါး ပေးပို့လာပါတယ်။ အဲဒီ အရာရှိဟာ မေမြို့ စစ်တက္ကသိုလ်ကျောင်းဆင်း အရာရှိတစ်ဦး ဖြစ်ကာ အဆင့်မြင့် သင်တန်းများသို့ ရွေးချယ် စေလွှတ် ခံရသူလည်း ဖြစ်ပါတယ်။ ကျောင်းဆင်းဆင်းခြင်း ခြေလျင်တပ်ရင်းများမှာ သာမန်အရာရှိ များကဲ့သို့ ကြာမြင့်စွာ မနေရဘဲ အဆင့်မြင့် သင်တန်းများသို့ တက်ရောက်ဖို့ ရွေးချယ်ခံရသူ ဖြစ်ပါတယ်။ သင်တန်း တက်နေချိန်မှာ နိုင်ငံတကာနဲ့ ယှဉ် အသိအမြင် ကျယ်ပြန့်ခဲ့ပြီး တပ်မတော်ရဲ့  ယိုယွင်းပျက်စီးနေမှု အပေါ် စိတ်ပျက်ကာ အမြင်မှန် ရခဲ့သူ၊ တပ်မတော် ပြုပြင်ပြောင်းလဲရေးအတွက် လိုလားဆန္ဒ ပြင်းပြခဲ့သူ ဖြစ်ပါတယ်။ ဒါကြောင့် မြန်မာနိုင်ငံမှာ စစ်အာဏာရှင် စနစ် ကောင်းကျိုးမပေးပုံကို ကျွန်တော့်ထံ ဆောင်းပါးများ ရေးသားပေးပို့ခဲ့ရာ ဒီကနေ့မှာတော့ သူ့ရဲ့စစ်အာဏာရှင်စနစ် ဆန့်ကျင်တိုက်ခိုက်ရေးအတွက် တပ်လှန့် နှိုးဆော် မေတ္တာရပ်ခံချက် ဆောင်းပါးအား ကျွန်တော် ကိုဖိုးတရုတ်မှ တင်ပြပေးလိုက်ရပါတယ်။ ယခုလို ဆောင်းပါး ရေးသား ပေးပို့လာတဲ့ ဆောင်းပါးရှင် တပ်မတော် အရာရှိအား ကျွန်တော် ကိုဖိုးတရုတ်မှ အထူးကျေးဇူး တင်ရှိပါတယ်။ ဆက်လက်ပြီး နှစ်သစ်ကူး အထူးအစီအစဉ် အနေနဲ့ ပြည်တွင်းပြည်ပက ဒီမိုကရေစီ လိုလားသော မျိုးချစ် တပ်မတော် အရာရှိများ ပေးပို့ထားတဲ့ ဆောင်းပါးများကို ဆက်တိုက် တင်ဆက်ပေးမဲ့ အကြောင်း စာဖတ်ပရိသတ်များအား သတင်း ကောင်းပါးအပ်ပါတယ်။
ကျွန်တော်တို့နိုင်ငံမှာ ဖြစ်ပေါ်နေတဲ့ အခြေအနေ ပေါ်မူတည်ပြီးတော့ ဒီခေါင်းစဉ်နဲ့ ကျွန်တော် ရေးသားလိုက် ပါတယ်။ ကျွန်တော် အခုပြောပြချင်တဲ့ သား (၃) သားဆိုတာကတော့ အများပြည်သူတွေ သိပြီးသားပါ။ ဘုရားသား ရဟန်း၊ ကျောင်းသားနဲ့ စစ်သား ဆိုတဲ့ သား (၃) သားပါ... ၊ တိုင်းရင်းသား ဆိုတာကတော့ ပြည်သူတွေကနေ ဖြစ်လာတာမို့လို့ ပြည်သူလို့ဘဲ သုံးလိုက်ရပါတယ်... အဲဒီ သား (၃) သားတွေအနေနဲ့ ပြည်သူတွေ အားလုံး. စည်းလုံးညီညွှတ်မှု ရှိဖို့အတွက် ဦးဆောင်မှု ပေးရန် လိုအပ်နေပါတယ်။ အဲ့ဒီသား (၃) သားကလည်း မိမိတို့ ပါဝင်ရမဲ့ နေရာ အခန်းကဏ္ဍတွေကနေ ပြည့်ပြည့်၀၀ ပါဝင်ကြပြီးတော့ အာဏာရှင်တွေကို ဆန့်ကျင် ကြမယ်ဆိုရင် ကျွန်တော်တို့တတွေ မျှော်လင့်နေတဲ့ ဒီမိုကရေစီ ပန်းတိုင်ကို မရောက်မရှိဘူးဆိုတာ ယုံကြည် ကြစေချင်ပါတယ်။
ဘုရားသား ရဟန်းသံဃာ အရှင်ဘုရားတို့ ဘုရား -
ရဟန်း သံယာတွေ အနေနဲ့ လည်း ပြီးခဲ့တဲ့ ၂၀၀၇ ခုနှစ် စက်တင်ဘာလ ရွှေဝါရောင် တော်လှန်ရေး လှုပ်ရှားမှုမှာ ဦးဆောင် ပါဝင်သလိုဘဲ နောက်တစ်ခါထပ်မံ ဖြစ်ပွားမဲ့ တော်လှန်ရေး အစီအစဉ်မှာ လည်း ယခင်တုန်းက လိုမျိုး တက်ကြွစွာ ပါဝင်ဖိုိ့ကို တပည့်တော် အနေနဲ့ တိုက်တွန်း လျှောက်ထားပါရစေ ဘုရား...
ကျောင်းသား ညီအစ်ကို မောင်နှမများ ခင်ဗျား -
ကျောင်းသားတွေ အနေနဲ့ နိုင်ငံတကာနဲ့ယှဉ် အသိဥာဏ် ကြွယ်ဝသူတွေ ပီပီ မိမိနိုင်ငံမှာ ပညာရေး အဆင့်အတန်း နိမ့်ကျပြီး အရွယ်မရောက်မှီ ကျောင်းက ထွက်ပြီးတော့ အပြင်မှာ စီးပွားရှာ ရုန်းကန်နေရရှာတဲ့ မိမိတို့နဲ့ အသက်အရွယ် တူညီသူတွေကို သနားညှာတာသော အားဖြင့် ဒီမိုကရေစီဆိုတဲ့ ပန်းတိုင်ကို လျှောက်လှမ်းတဲ့ နေရာမှာ အားလုံး ပါဝင်ဆင်နွှဲကြဖို့ကို ကျွန်တော့် အနေနဲ့ ကမ်းလှမ်း ဖိတ်ခေါ်ပါတယ်......
စစ်သား ရဲဘော်ရဲဘက်များ ခင်ဗျား -
စစ်သားတွေကလည်း အမှားနဲ့ အမှန်ကို ဝေဖန်ပိုင်းခြားတတ်ဖို့ လိုအပ်လာပါပြီ။ ဘာလို့လဲဆိုတော့ ကျွန်တော်တို့ မြန်မာနိုင်ငံက စစ်အာဏာရှင်တွေရဲ့  ခိုင်းတာလုပ်၊ ခေါ်ရင်လာ၊ ခံမပြောနဲ့ ဆိုတဲ့ “ခ” သုံးလုံး ကို တွင်တွင်သုံးပြီး တဖက်သတ်ဆန်တဲ့ အမိန့်တွေကို မိမိ အသိဥာဏ်နဲ့ မိမိ စဉ်းစားဖို့လိုရာမှာ အခုလက်ရှိ မြန်မာနိုင်ငံမှာ ပြည်သူတွေ ဘယ်လောက် ခက်ခက်ခဲခဲ နေ နေကြရတယ်၊ မိမိ ၀မ်းစာကို မိမိ ဘယ်လောက်တောင် ရုန်းကန်ပြီးတော့ ရှာဖွေနေကြရတယ် ဆိုတာတွေကို နည်းနည်းလေး ဖြစ်ဖြစ် စဉ်းစားပြီးတော့ အဖြေရှာကြ စေချင်ပါတယ်၊ စစ်သားတွေရဲ့ အဓိက ထမင်းရှင်က ပြည်သူတွေပါ၊ ပြည်သူတွေဆီက အခွန်အကောက်တွေနဲ့ ကောက်ခံပြီးတော့ လခ ဆိုပြီး ဖြန့်ခွဲပေးလိုက်တာပါ၊ အဲဒီတော့ မိမိတို့ တိုင်းသူပြည်သားတွေ အခက်အခဲတွေ ဖြစ်ပေါ်နေတာတွေကိုလည်း လစ်လျူရှူဖို့ မကောင်းပါဘူး၊ စစ်တပ် အကြီးအကဲ လက်တစ်ဝါးစာ စစ်အာဏာရှင်တွေရဲ့ ထိုင်ခုံတွေ တည်မြဲ ဖို့ကို အောက်ခြေစစ်သားတွေက အသက်နဲ့ ရင်းပြီးတော့ အချင်းချင်း တိုက်ခိုက်ပေးနေရတာကို အရမ်းသနားပါတယ်။ ဒီလိုမျိုးတွေ မဖြစ်ဖို့ အတွက် ကျွန်တော့်အနေနဲ့ ရဲဘော်ရဲဘက်တွေ အားလုံးကို စစ်သားစကားနဲ့ ပြောရရင် “တပ်မတော် သမိုင်းကြောင်း ကောင်းဖို့အတွက် သေနတ်ပြောင်းဝ ပြောင်းပြန် ပြန်လှည့်ဖို့” အချိန်တန်ပြီလို့ တိုက်တွန်းရင်း သား (၃) သား လှုပ်ရှားမှုမှာ ပါဝင်လှုပ်ရှားကြဖို့ တာဝန်ရှိကြောင်း ပြောကြားလိုပါတယ်...
တိုင်းရင်းသား ညီအစ်ကို မောင်နှမများ ခင်ဗျား -
တိုင်းရင်းသားတွေဘက်ကလည်း ပြန်စဉ်းစားဖို့ အချိန်တန်ပါပြီ၊ ဘာကိုလည်းဆိုတော့ ကျွန်တော်တို့ရဲ့ လွတ်လပ်ရေး ဖခင်ကြီး ဗိုလ်ချုပ် အောင်ဆန်းက ပြည်ထောင်စု မြန်မာနိုင်ငံတော် ဆိုပြီး မြန်မာနိုင်ငံကို ရုပ်လုံး ဖေါ်ပေးခဲ့ပါတယ်၊ ဒါပေမဲ့ အခု နအဖ စစ်အစိုးရ လက်ထက်မှာ တိုင်းရင်းသား လူမျိုး တစ်စုထဲ မှာတောင် ပြန်လည် သင့်မြတ်ဖို့ ခက်ခဲအောင် သွေးခွဲ ထားခဲ့ပါတယ်၊ သမိုင်းကြောင်း မရှိတဲ့ “၀” လူမျိုး WNA တပ်ဖွဲ့တွေကို ကြောက်လန့်ပြီး ရှမ်းပြည်နယ်ကို ခွဲထုတ်ကာ “၀” ပြည်နယ် အဖြစ် စီစဉ်ပေးနေပါတယ်။ ဒီလို သွေးခွဲ အုပ်ချုပ်နေတဲ့ နအဖ စစ်အာဏာရူးတွေကို မြန်မာနိုင်ငံမှာ နေထိုင်ကြသော တိုင်းရင်းသား လူမျိုးစု တွေ အားလုံးက ပါဝင်ပြီးတော့ ဆန့်ကျင်တိုက်ခိုက်ကြပါ၊ လက်နက်ကိုင် တိုင်းရင်းသားတွေ အနေနဲ့ လည်း ပါဝင်တိုက်ခိုက်ကြပါ၊ လက်နက်မဲ့ တိုင်းရင်းသားတွေ အနေနဲ့လည်း မိမိတို့ တတ်နိုင်တဲ့ အင်အားနဲ့ ဘုရားသား၊ကျောင်းသား၊ စစ်သား၊ တိုင်းရင်းသား၊ ပြည်သူပြည်သားဆိုတဲ့ သား (၅) သား ပူးပေါင်း စစ်ဆင်ရေးမှာ ပါဝင်ကြဖို့ ကျွန်တော့် အနေနဲ့ လက်တွဲဖိတ်ခေါ်ပါရစေ....
ပြည်သူပြည်သားများ ခင်ဗျား -
မြန်မာနိုင်ငံတော်မှာ နေထိုင်ကြတဲ့ ပြည်သူပြည်သားတွေ အနေနဲ့ မိမိတိုင်းပြည်က ထွက်တဲ့ သယံဇာတတွေ ဟာ နိုင်ငံတော်ကို အုပ်ချုပ်နေတဲ့ အုပ်ချုပ်သူ လူတန်းစား တစ်ခုတည်းက ပိုင်ဆိုင်တဲ့အရာ မဟုတ်ကြောင်း နားလည်ကြပါ။ ဒီမိုကရေစီဆိုတာ လူတိုင်းလူတိုင်းမှာ လွတ်လပ်မှုတွေများစွာနဲ့ နေထိုင်လို့ရတာကို ဒီမိုကရေစီလို့ ခေါ်ပါတယ်... မိမိနိုင်ငံဟာ များစွာ ချမ်းသာပါတယ်၊ မိမိတို့နိုင်ငံမှာ တွင်းထွက် သယံဇာတတွေဟာ ဘယ်တော့မှ မကုန်နိုင်တာကို စစ်အာဏာရှင်တွေက သူတို့ ရပိုင်ခွင့်လို့ ထင်နေတဲ့ “အရမ်းမှားတဲ့ အတွေးအခေါ်” ကို တော်လှန်ကြပါ...
ကျွန်တော်တို့ တိုင်းပြည်မှာ ဆိုရင် ကလေးတွေဟာ အသက် ၁၀ နှစ်ကျော်တာနဲ့ လမ်းဘေးမှာ ပိုက်ဆံလိုက်တောင်းတဲ့ သူတွေရှိသလို ရေခဲရေ ရောင်းရတဲ့ ကလေးတွေလည်း ရှိပါတယ်... ဘယ်နိုင်ငံမှာမှ မရှိဘူးလို့ မပြောပါဘူး... အခြားအခြားသော တိုင်းပြည်တွေမှာတော့ မြန်မာပြည်မှာ ဖြစ်ပျက်နေတဲ့ ကလေး ဦးရေ ရဲ့ ၁၀၀ ပုံ ပုံရင် ၁ ပုံ လောက်ဘဲ ရှိပါတယ်။ UNICEF ကုလသမဂ္ဂ ကလည်း မြန်မာနိုင်ငံကို အနည်းအကျဉ်း ထောက်ပံ့ခဲ့ပါတယ်... အဲ့ဒီငွေတွေက ဘယ်မှာ သွားသုံးနေတာလည်း ဆိုတာကို စာရင်းမပြနိုင်ဘူး ဖြစ်နေပါတယ်။ မြန်မာနိုင်ငံမှာ စစ်အင်အားတွေ တိုးချဲ့နေတယ်... စစ်တပ်ကို ခမ်းနားထည်ဝါအောင် လုပ်ပြီးတော့ ဘယ်သူနဲ့ တိုက်မှာလဲ... မြန်မာပြည်ကို ဘယ်နိုင်ငံက လာတိုက်မှာ မို့လို့လဲ... အခုလို တိုးတက်နေတဲ့ ခေတ်ကြီးထဲမှာ မြန်မာနိုင်ငံမှာ စစ်တပ်အင်အား နည်းတယ်လို့ သဘောထား ကြည့်လိုက်ကြရအောင်... ဘယ်နိုင်ငံက လာတိုက်မှာလဲ... အခြားအခြားသော နိုင်ငံတွေက မြန်မာနိုင်ငံကို လိုချင်လွန်အားကြီးလို့ လာတိုက်ပြီ ဆိုရင်တောင် ဘယ်နိုင်ငံက လက်ခံမှာလဲ... စဉ်းစားကြည့်ပေါ့... စစ်တပ်ဆိုတာ မရှိရင် မဖြစ်ပေမဲ့ မလိုအပ်ဘဲ အင်အားတိုးချဲ့ပြီး အကန့်အသတ်မရှိ ငွေကြေးသုံးစွဲခွင့်တော့ မရှိသင့်ပါ။ ဒါကြောင့် နောက်ထပ် တက်လာမဲ့ စစ်အာဏာရူးတွေ မရှိရအောင် အခု အချိန်ဟာ အားလုံး စည်းလုံးညီညွှတ်မှုရှိဖို့ အရေးကြီး နေပါတယ်။
စစ်အာဏာရှင်တွေဟာ စစ်တပ်ကို အကြောင်းပြုပြီး နိုင်ငံတကာက လက်နက်ခဲယမ်းတွေကို မတန်တဆ ငွေကြေးများနဲ့ ပေးဝယ်ရာမှာ သူတို့ အကျိုးစီးပွားအတွက် အိတ်ထဲ ထည့်တာကိုတော့ ပြည်သူတွေ မပြောနဲ့ စစ်တပ် တပ်မတော်သားတွေတောင် မသိလိုက်ရပါဘူး။ ဥပမာ- သန်းရွှေရဲ့  မွေးစားသားလို့ ခေါ်တဲ့ ဦးတေဇအနေနဲ့ စီးပွားဘက် အကျိုးအမြတ် ပွဲခတွေကို Percentage အလိုက် တိုင်းပြည်ဘဏ္ဍာငွေ ဆီကလည်းကောင်း၊ လက်နက် ရောင်းချနေတဲ့ နိုင်ငံတွေဆီမှ လည်းကောင်း နှစ်ဖက်စလုံးမှ ပွဲခ ရယူလိုက်တာမို့ တပ်မတော်နဲ့ တိုင်းပြည်ဟာ များစွာနစ်နာခဲ့ရပါတယ်။ ဦးတေဇက ဦးသန်းရွှေ မိသားစုရဲ့ စီးပွားရေးကို လုပ်ကိုင်ပံ့ပိုးနေတဲ့သူ ဖြစ်ပါတယ်။ သူတို့ အိတ်ကဒ်ထဲ ရောက်တဲ့ ပိုက်ဆံတွေကို ပြည်သူတွေရဲ့  အမှန်တကယ် လိုအပ်ချက်အား ဖြည့်ဆည်းပေးလိုက်ရင် ဘယ်လောက် ကောင်းမလဲ။
ကျွန်တော်တို့ရဲ့ ဖခင် ဗိုလ်ချုပ်အောင်ဆန်းဟာ စစ်တပ်ကို ဘာကြောင့် ထူတောင်တာလဲ ဆိုတာကို အခု အုပ်ချုပ်နေတဲ့ စစ်အာဏာရူးတွေက မသိချင်ယောင်ဆောင် နေကြတာပါ... ဗိုလ်ချုပ်အောင်ဆန်းသာ အသက်ရှင်လျှက် ရှိမယ်ဆိုရင် ဦသန်းရွှေတို့ရဲ့ ဆရာ ဦးနေ၀င်းတောင် ခါးကိုင်း အလေးပြုနေရမှာပါ... အခုလက်ရှိ အုပ်ချုပ်နေတဲ့ စစ်အာဏာရူးတွေကတော့ ဘယ်ကနေ ဘယ်လို အချောင် ရနိုင်မယ် ဆိုတာကိုဘဲ တွက်ပြီးတော့ အုပ်ချုပ်နေ ကြတာပါ... ဒီလို သဘောထားနေတာကို ကျွန်တော်တို့ အနေနဲ့ ဘယ်လိုမှ လက်ခံနိုင်စရာ အကြောင်းမရှိ်ပါဘူး... အခု စစ်တပ်မှာ ရွတ်ဆိုနေတဲ့ သစ္စာ (၄)ချက်ဆိုတာက ဗိုလ်ချုပ်အောင်ဆန်း ကိုယ်တိုင် စဉ်းစားပြီးတော့ ရေးထားတာတွေ ဖြစ်ပါတယ်။ အခု စစ်အာဏာရှင်တွေ လုပ်နေတာက ဒီသစ္စာ လေးချက်နဲ့ ဆန့်ကျင်ဘက် ဖြစ်နေပါတယ်။ အာဏာရှင်တွေ ပြောနေတဲ့ ပြည်ပအားကိုး ပုဆိန်ရိုးဆိုတာ လက်တွေ့ကျတော့ အာဏာရူးတွေ ကသာ ပေါက်ဖော်တွေကို အားကိုးပြီး ဖင်မခံရုံတမယ်ပါဘဲ။ တရုတ်ကို အားထားလို့ တရုတ်နိုင်ငံက ရေဒါ စခန်းကို တောင်မှ မြန်မာနိုင်ငံ မြေပေါ်မှာ ပေးဆောက်တာ ဘယ်လိုလုပ်ပြီး ကောင်းနိုင်မှာလဲ... အခုလက်ရှိ အတိုက်အခံလို့ ပြောပြောနေတဲ့ အတိုက်အခံတွေကလည်း ဘယ်သူကမှ အတိုက်အခံဖြစ်ချင်နေတာ မဟုတ်ပါဘူး... ပြည်သူတွေဘက်ကနေ ရပ်တည်ပြီး ပြည်သူ့အကျိုးကို ကြည့်ပြီးတော့ အတိုက်အခံ လုပ်နေကြတာပါ... မိမိတုိ့ငယ်ငယ်လေး ကတည်းက နေခဲ့တဲ့ တိုင်းပြည်ကို ဘယ်သူက ခွဲသွားချင်မှာလဲ... ဒီလို ခံစားချက်မျိုးကို ခံစားတတ်တာက ရုရှားရောက် အရာရှိတွေ အားလုံး ခံစားတတ်ပါတယ်... မိမိမွေးဖွားရာ နိုင်ငံမှာ မနေရဘဲ သူများနိုင်ငံတွေမှာ သွားနေပြီး အတိုက်အခံလုပ်နေရတာက ဘယ်လိုမှ မကောင်းပါဘူး... ကမ္ဘာမှာ မိမိတိုင်းပြည်ရဲ့ နိုင်ငံသား ခံယူထားသူတွေ အားလုံးဟာ မိမိနိုင်ငံသားပါ... စစ်အာဏာရူးတွေကတော့ တိုင်းပြည်မှာရှိတဲ့ အခြားအခြားသော လူမျိုးစုတွေ အားလုံးကိုတောင် သွေးခွဲအုပ်ချုပ်မှူဆိုတဲ့ စနစ်နဲ့ အုပ်ချုပ်ထား ပါတယ်... ပြီးတော့ ပိုက်ဆံနဲ့ အာဏာရှိမှ မြန်မာနိုင်ငံမှာ လူလုပ်လို့ ရမယ်ဆိုတဲ့ ပုံစံကို မြန်မာနိုင်ငံမှာ ရိုက်ထည့် ထားတာကလဲ ဒီလို အသုံးမကျတဲ့ စစ်အာဏာရူးတွေပါဘဲ... ဘာကြောင့်လဲဆိုတော့ ဥပမာ... ဘောလုံးအရမ်း ကစားကောင်းတဲ့ ကောင်လေး တစ်ယောက်ရှိခဲ့တယ်... ဒီကောင်လေးက မွန်လူမျိုး ဖြစ်ပြီး အရမ်း ဆင်းရဲပါတယ်... အဲဒီတော့ တိုင်းရင်းသားလည်းဖြစ်ပြီး အရမ်းဆင်းရဲတော့ သူ့ကို ဘောလုံးပွဲမှာ ၀င်ကစားဖို့ လုံးဝ သဘောမတူခဲ့ပါဘူး... သူ့အစား ပိုက်ဆံချမ်းသာတဲ့ လူတစ်ယောက်က ၀င်ကစားသွားပါတယ်... အဲဒီလို အသေးအဖွဲမျိုး အောက်ခြေမှာ ဖြစ်ပျက်နေတာတွေကို စစ်အာဏာရူးတွေက မသိချင်ယောင်ဆောင်ပေး နေကြပါတယ်... ပြီးတော့ စစ်တပ်ဆိုတာကလည်း ဖာချ ၊၀ရမ်းပြေး ၊သူခိုး စတဲ့ မကောင်းတဲ့ လူတွေကို စုထားတဲ့ နေရာ တစ်ခုလို ဖြစ်နေတာကို စစ်အာဏာရူးတွေက သိရက်နဲ့ လစ်လျူရူထားပါတယ်။ သိတယ်ဆိုတာက လေးလပတ် အစည်းအဝေး တစ်ခုမှာ သန်းရွှေကိုယ်တိုင် ဆူပူပြောဆိုခဲ့တာပါ။ စစ်တပ်မှာဆိုရင် အောက်ခြေ စစ်သားတွေ ရဲဘော်တွေကို ကြည့်မယ်ဆိုရင် ဘယ်လောက်တောင် မြေဇာပင် ဖြစ်မှန်းမသိ ဖြစ်နေကြတာကို ကြည့်ပြီး အရမ်းသနားမိပါတယ်... တပ်ရင်း တစ်ရင်းမှာ တပ်ရေးဗိုလ်ကြီး လုပ်သူက ရဲဘော်တွေရဲ့ ချွေးနဲစာ တွေကို တပ်ရင်းမှူးနဲ့ ပေါင်းစား နေကြတာ တွေ့ရပါတယ်... တပ်ထောက်ဗိုလ်ကြီး ကလည်း ရဲဘော်တွေရဲ့ အ၀တ်အစားတွေကို ပြောမယ်ဆိုရင် ချပ်ဝတ် တန်ဆာတွေကို တပ်ရင်းမှူးနဲ့ ပေါင်းပြီး ခိုးစားနေကြပါတယ်... ဒီလိုစစ်တပ်ရဲ့ ဖြစ်ပျက်နေတဲ့ အခြေအနေ အမှန်ကို စစ်အာဏာရူးတွေက မသိချင်ယောင် ဆောင်နေကြပါတယ်...
ဒီိမိုကရေစီဆိုတာက လူတိုင်းလူတိုင်းမှာ လွတ်လပ်စွာ အသက်ရှင် ပိုင်ခွင့်ရှိတယ်... ရပိုင်ခွင့်ရှိတယ်။ အခုမြန်မာနိုင်ငံမှာ လူ(၄)ယောက် စုပြီး လမ်းလျှောက်ရင်တောင် ဖမ်းဆီးမှုတွေ ရှိတယ်ဆိုတော့ ဘယ်လိုလုပ်ပြီး ကောင်းနိုင်မှာလဲ... ပြီးတော့ မြန်မာနိုင်ငံမှာ နိုင်ငံသားဖြစ်ပြီးတော့ မိမိအိမ်ကနေပြီး အဘွားအိမ်ကို သွားအိပ်မယ်ဆိုရင်တောင် အဘွားအိမ် ရောက်ရင် ရပ်ကွက်ရုံးကို သွားပြီးတော့ သန်းခေါင်စာရင်း တိုင်ရတယ်... ကဲ ကောင်းသေးလား... ရုရှားမှာ သင်တန်းတက်နေတဲ့ အရာရှိတွေဆိုရင် ပိုသိမှာပေါ့... ဘာလို့လဲဆိုတော့ သူများနိုင်ငံမှာ နိုင်ငံကူးလက်မှတ်နဲ့ နေနေတဲ့ သူတွေတောင်မှ ဧည့်စာရင်းတိုင်တာတွေ မလုပ်ရဘဲ အေးအေးဆေးဆေး သွားလာလို့ ရပါတယ်... ရုရှားရောက် အရာရှိတွေ အနေနဲ့ မိမိတိုင်းပြည်နဲ့ ပြည်ပနိုင်ငံတွေ ဘယ်လောက်တောင် ကွာဟချက်တွေရှိတယ်.. သူများနိုင်ငံတွေက ဘယ်လိုပုံစံလဲ မိမိနိုင်ငံက ဘယ်လို ပုံစံလဲဆိုတာကို ကိုယ်တွေ့မို့ ချင့်ချိန်စဉ်းစားကြည့်ကြပေါ့... မိမိနိုင်ငံမှာ စစ်တပ်က အုပ်ချုပ်နေတဲ့ အချိန်မှာ သံဃာတွေ ငြိမ်းချမ်းစွာ ဆန္ဒ ပြတာကို စစ်တပ်နဲ့ ရဲတွေက ပူုးပေါင်းပြီးတော့ အတင်းတိုက်ဖျက်တာ ဘာကြောင့်လဲ.... ပြီးတော့ စစ်တပ်မှာ တာဝန်ထမ်းဆောင်နေတဲ့ စစ်သားတွေက ဗုဒ္ဓဘာသာဝင်တွေ မဟုတ်လို့လား... စစ်တပ်မှာ တာဝန်ထမ်းဆောင်နေသူတွေ အားလုံးဟာ ဗုဒ္ဓဘာသာဝင်တွေ ပါဘဲ... ဒီလို ဗုဒ္ဓဘာသာဝင်တွေ ဖြစ်နေပြီးတော့ သူတို့အနေနဲ့ သံဃာတွေကို ရိုက်နှက်တာတွေကိုတောင် လုပ်ရဲအောင် ဘယ်သူတွေက မြှောက်ပင့်ပေးတာလဲဆိုတော့... စစ်အာဏာရူးတွေက သံဃာစက်ထက် အာဏာစက်က ပိုကြီးတယ် ဆိုပြီးတော့ လက်အောက် ငယ်သားတွေကို ပြောပြီး ရိုက်နှက်မှုတွေနဲ့ သံဃာသွေးတွေကို မြေကျအောင် လုပ်ခဲ့ကြပါတယ်... စစ်အာဏာရှင်တွေဟာ အရမ်းကို တကိုယ်ကောင်းဆန်တဲ့ အာဏာရူးတွေ ဖြစ်ပါတယ်... စစ်တပ်မှာ အုပ်ချုပ်နေတဲ့ သူတို့တွေရဲ့သားသမီးတွေကို ကြည့်လိုက်စမ်းပါ... သူတို့တွေ ဘယ်လိုနေ နေကြလဲဆိုတာကို ကြည့်ကြည့်ပါ... မိမိနဲ့ နီးစပ်တဲ့ သူတွေရဲ့ အသိုင်းအ၀န်း တွေကို ကြည့်ကြည့်ပေါ့... စစ်အာဏာရူးတွေရဲ့ သားသမီးတွေဟာ ပြည်သူတွေရဲ့ ရပိုင်ခွင့်တွေ အားလုံးကို လက်ဝါးကြီး အုပ်ပြီး ကိုယ်ကျိုးအတွက် သုံးဖြုန်းနေတာ လုံးဝ သဘာဝမကျတဲ့ လုပ်ရပ်တွေပါ... နိုင်ငံကို အုပ်ချုပ်တယ် ဆိုတာက ကိုယ်ကျိုးစီးပွားကို ရှာပြီးတော့ ကိုယ့်ဆွေမျိုးတွေ ကောင်းစားဖို့ အတွက်လို့များ စစ်အာဏာရူးတွေ ထင်နေကြလား မသိပါဘူး... အခုလိုမျိုး စစ်အာဏာရူးတွေရဲ့ လုပ်ရပ်တွေကို မနှစ်မြို့သော မျိုးချစ်မြန်မာ လူမျိုးတွေ အနေနဲ့ ၂၀၀၉ ခုနှစ်ကို ကျွန်တော်တို့ရဲ့ တိုက်ခိုက်ရေးနှစ် အဖြစ်နဲ့ ကျန်ရစ်အောင် သား (၃) သားနဲ့ တိုင်းရင်းသားပြည်သူတွေ အားလုံး လက်တွဲကာ မိမိရှိရာနေရာ မိမိ တတ်နိုင်တဲ့ ဘက်က အားလုံး ပါဝင်ကြပြီးတော့ စစ်အာဏာရူးတွေ ပြုတ်ကျအောင် ကျွန်တော်တို့နဲ့ အတူလက်တွဲလို့ တိုက်ခိုက်ကြပါစို့လို့ တိုက်တွန်းရေးသားရင်း နိဂုံးချူပ်လိုက်ရပါတယ်။
No comments:
Post a Comment