 |  |
| မျိုးကြီး |
| သောကြာနေ့၊ အောက်တိုဘာလ 17 2008 19:53 - မြန်မာစံတော်ချိန် |
| ရွှေလီ။ ။ ဘာသာရေးအဖွဲ့များက တားမြစ်သည့်ကြားက မြစ်ကြီးနားမြို့တွင် ခရစ်ယာန် သချိုင်းတခုကို ဖျက်ဆီးပစ်ခြင်းကို အာဏာပိုင်များက ဆက်လက် ပြုလုပ်လျှက် ရှိသည်။ မြစ်ကြီးနားမြို့ ဒူကထောင်ရပ်ကွက်ရှိ ခရစ်ယာန် သချိုင်းအုတ်ဂူများကို အောက်တိုဘာ ၁၄ ရက်မှစတင်ကာ မြေထိုးစက်များဖြင့် ဖြိုရှင်းခဲ့ရာ ထက်ဝက်ခန့် ဖျက်စီးပြီးသွားပြီ ဖြစ်သည်။ "ကချင်ဘာသာရေး အသင်းဆရာတွေက မဖျက်ဆီးဖို့၊ အာဏာပိုင်တွေ အဆက်ဆက်ကို စာတင်ခဲ့တယ်။ တိုင်းမှူး ဗိုလ်ချုပ်မောင်မောင်ဆွေ၊ ဗိုလ်ချုပ်အုန်းမြင့် လက်ထက်အထိ မဖျက်သေးဘဲ ကြက်ဆူစီမံကိန်း စိုက်ခင်း ဆိုင်းဘုတ် စိုက်ထားခဲ့တာ။ အခုတိုင်းမှူး လက်ထက်မှာ ဖျက်ဆီးလိုက်တာပေါ့" ဟု ဒူကထောင်ရပ်ကွက်သား ဒေသခံ ကချင်လူငယ်က ပြောသည်။ ၂ဝဝ၃ ခုနှစ်အတွင်းက မြောက်ပိုင်းတိုင်းမှူး ဗိုလ်ချုပ်မောင်မောင်ဆွေ လက်ထက်တွင် အဆိုပါ သင်္ချိုင်းမြေနေရာ သိမ်းယူခဲ့ပြီးနောက် ကြက်ဆူ စိုက်ပျိုးရေး စီမံကိန်းအတွက်ဟု ဆိုင်းဘုတ် စိုက်ထူခဲ့သည်။ ၁၉၆ဝ ခုနှစ်မှစတင်ကာ အသုံးပြုခဲ့သော သချိုင်းမြေဖျက်သိမ်းရာတွင် အရိုးများ ပြန်လည် တူးဖော်ခွင့် မပြုသည့်အတွက် ကချင် လူမှုအဖွဲ့အစည်းတခုက ပြစ်တင် ပြောဆိုလိုက်သည်။ "အဖိုးအဖွားတွေ၊ မိဘတွေရဲ့ အုတ်ဂူတွေ၊ အရိုးတွေ အထွတ်အမြတ် ထားတယ်။ အမှတ်တရ ထားတယ်။ ဘာသာရေး ယုံကြည်မှုအရရော ကချင်လူမျိုးတွေက အဲလို သဘောထားတော့ အာဏာပိုင်တွေ လုပ်တာကို ရပ်ကွက်သားတွေက စိတ်ဆင်းရဲနေကြတယ်" ဟု ထိုင်းနိုင်ငံ အခြေစိုက် ကချင် လူမှုဖွံ့ဖြိုးရေး ကွန်ယက်မှ ခေါင်းဆောင် ကိုအောင်ဝါက ပြောသည်။ ဖျက်သိမ်းလိုက်သည့် သင်္ချိုင်းအစား ဒူကထောင် ရပ်ကွက်နှင့် ၁ဝ မိုင်ခန့် ကွာဝေးသည့် နှောင့်နန်းရွာ သင်္ချိုင်းသို့ သွားရောက် မြှုပ်နှံကြရသည်။ |
No comments:
Post a Comment