 |  |
| သန်းထိုက်ဦး |
| သောကြာနေ့၊ အောက်တိုဘာလ 17 2008 19:57 - မြန်မာစံတော်ချိန် |
| ချင်းမိုင်။ ။ အကျဉ်းကျခံနေရသည့် ဟာသ သရုပ်ဆောင် ဇာဂနာ ခေါ် ကိုသူရသည် ပြီးခဲ့သည့် ၂ ရက်က မိသားစုထံ ဆေးဝါးများ မှာယူနေသဖြင့် သူ့ကျန်းမာရေးအတွက် မိသားစုဝင်များက စိုးရိမ် ပူပန်နေကြသည်။ ယခုလ ၁၅ ရက်နေ့က ကိုဇာဂနာအား ဖမ်းဆီး ထိန်းသိမ်းထားသည့် ရန်ကုန်တိုင်း အင်းစိန် အကျဉ်းထောင်ရှိ အနောက်ပိုင်း ခရိုင်တရားရုံးတွင် ရုံးထုတ်ခဲ့ရာ သူက လုံခြုံရေးဝန်ထမ်းမှတဆင့် အသဲအားတိုးဆေးနှင့် အစာအိမ်ဆေးများ မှာကြားခဲ့သဖြင့် မိသားစုဝင်များမှ စိုးရိမ်မကင်း ဖြစ်နေခြင်း ဖြစ်သည်။ "ရောဂါအခြေအနေက စိတ်ပူလို့ပေါ့နော်။ ကာကွယ်တဲ့ အနေနဲ့ ဒီဆေးကို သုံးချင်လို့လား၊ ရုတ်တရက်ဖြစ်လာရင် သောက်မလို့လား။ မသိဘူးပေါ့နော်။ သူနဲ့မှ မတွေ့ရဘဲ ရဲနဲ့ပဲ တွေ့ရတာကိုး။ ရဲက ''အဲဒီဆေး၊ အဲဒီဆေး၊ ကိုသူရ မှာတယ်'' ဆိုတဲ့အခါကျတော့။ သွားတဲ့အကိုကလည်း မမေးခဲ့ဘူးလေ" ဟု ဇာဂနာ၏ မိခင် ဒေါ်ကြည်ဦးက မဇ္ဈိမကို ပြောသည်။ ဒေါ်ကြည်ဦးက ဆက်ပြီး ''လူကတော့ နည်းနည်း ပိန်သွားတယ်ပေါ့။ အန်တီတို့ကတော့ သွားမကြည့်ဘူးလေ။ မသွားနိုင်ဘူး။ ဝေးလို့လေ။ သားကိုပဲ လွှတ်တာပေါ့။ လူကတော့ ပိန်သွားတယ်ပေါ့။ မှာတဲ့ဆေးကို တနင်္လာနေ့ကို ပို့လို့ရတယ်လေ။ အဲဒီနေ့ကို သွားပို့မယ်'' ဟု ပြောသည်။ အကျဉ်းထောင်အတွင်း၌ ဆေးဝါး မစုံလင်သလို၊ ကုသမှု အပိုင်းတွင်လည်း ချို့တဲ့သောကြောင့် ထောင်ပြင်ပရှိ နိုင်ငံရေးအကျဉ်းသား မိသားစုများက သူတို့၏ စိုးရိမ်ပူပန်မှုကို မကြာခဏဆိုသလို ယခုလို ထုတ်ဖော်ပြောဆိုလေ့ ရှိသည်။ ထိုင်းနိုင်ငံ အခြေစိုက် နိုင်ငံရေး အကျဉ်းသားများ ကူညီစောင့်ရှောက်ရေးအသင်း (မြန်မာနိုင်ငံ) မှ အတွင်းရေးမှူး ဦးတိတ်နိုင်က "ထောင်ထဲမှာက လူနာတွေ၊ နေမကောင်းတဲ့ လူတွေကို ပေးတယ်ဆိုတာ ဒါမျိုးဆေးတွေ ပေးလေ့ မရှိပါဘူး။ ပါရာစီတမောတို့ပဲ ထောင်ထဲမှာ ပေးလေ့ ရှိပါတယ်'' ဟု ဆိုသည်။ ''အိုင်စီအာစီ (အပြည်ပြည်ဆိုင်ရာ ကြက်ခြေနီအဖွဲ့) ၀င်လို့ မရတော့တဲ့ နောက်ပိုင်းကာလက စပြီးတော့ နိုင်ငံရေး အကျဉ်းသားတွေရဲ့ ကျန်းမာရေး စောင့်ရှောက်မှု အခြေအနေက တော်တော် ဆိုးဝါးလာတယ်။ ကျနော်တို့ဆီမှာ အယောက် ၅၀ ကျော် စာရင်းပြုစုထားတာ ရှိတယ်လေ။ ရောဂါအလိုက် တော်တော်လေး ကျန်းမာရေး မကောင်းတဲ့ လူတွေပေါ့နော်'' အမှုအတွက် ဆောင်ရွက်ပေးနေသည့် ရှေ့နေ ဦးခင်မောင်ရှိန်က ရုံးထုတ်စဉ်က ကိုဇာဂနာ၏ ကျန်းမာရေး ကောင်းမွန်သည်ဟု ပြောဆိုနိုင်သော်လည်း ရောဂါအခံများ ရှိနေသည်ကို ထောက်ပြ ပြောဆိုသည်။ ကိုဇာဂနာတွင် ယခင်ကတည်းက သွေးတိုး၊ အစာအိမ်၊ ကျီးပေါင်းတက်သည့် ရောဂါ၊ နှလုံးရောဂါ စသဖြင့် ရှိသလို အဖမ်းမခံရခင်က သွေးတိုးသောကြောင့် မူးလဲပြီး မဟာမြိုင် ဆေးခန်းသို့ သူ၏ အပေါင်းအသင်းများက လိုက်လံ ပို့ဆောင်ခဲ့ရသေးသည်။ ယခုနှစ် ဇွန်လဆန်းက အထူး ရဲသတင်းတပ်ဖွဲ့နှင့် ရပ်ကွက် အေးချမ်းသာယာရေး ကောင်စီမှ တာဝန်ရှိသူ ၉ ဦးတို့က ကိုဇာဂနာ၏ နေအိမ်အတွင်း ရှာဖွေမှုများ ပြုလုပ်ကာ၊ လူကိုပါ ဖမ်းဆီးသွားခဲ့သည်။ ဖမ်းဆီးခံရချိန်တွင် ကိုဇာဂနာသည် နာဂစ်မုန်တိုင်းသင့် ဧရာဝတီတိုင်းမှ ဒုက္ခသည်များအား ထောက်ပံ့ကူညီရေးအတွက် အားတက်သရော ပြုလုပ်နေခဲ့သည်။ နိုင်ငံတကာ၏ ကူညီထောက်ပံ့မှုများကို နအဖ စစ်အစိုးရက ရုတ်တရက် ငြင်းဆန်ခဲ့ကာ၊ ဆိုးရွားလှသည့် ပျက်စီး သေဆုံးမှုများအား လျှော့ပေါ့ပြောဆို သတင်းထုတ်လွှင့်ချိန်တွင် ကိုဇာဂနာတို့ကဲ့သို့ စေတနာရှင်များက ပြည်ပမီဒီယာများမှတဆင့် အခြေအနေမှန်ကို ဖော်ထုတ်ခဲ့ကြသည်။ ၂၀၀၇ ခုနှစ် စက်တင်ဘာလအတွင်းက သံဃာတော်များ ဦးဆောင်သည့် ရွှေဝါရောင် တော်လှန်ရေးတွင်လည်း သံဃာတော်များအား ထင်ရှားသည့် နိုင်ငံရေးသမားကြီး အမျိုးသားရေး ဦးဝင်းနိုင်၊ နိုင်ငံကျော် ရုပ်ရှင်မင်းသား ကျော်သူတို့နှင့်အတူ သူက ရေနှင့် ဆွမ်း ကပ်လှူခဲ့သည်။ နိုင်ငံတော် အာဏာပိုင်များ၏ မတရားဖိနှိပ်မှုများအပါအ၀င် လုပ်ကိုင်ဆောင်ရွက်မှု ညံ့ဖျင်းလွဲချော်နေမှုများကို အများပြည်သူ ရှေ့မှောက်၌ ဖွင့်ဟထုတ်ဖော် ပျက်ရယ်ပြုလေ့ ရှိသဖြင့်လည်း အာဏာပိုင်များက မကြာခဏ ခေါ်ယူစစ်ဆေးမှုနှင့် ဖမ်းဆီးချုပ်နှောင်မှု ခံခဲ့ရသူလည်း ဖြစ်သည်။ ယခုအခါ သူ့ကို နိုင်ငံတော်အား အကြည်ညိုပျက်စေမှု အပါအ၀င် ပုဒ်မ ၇ ခုဖြင့် တရားစွဲဆိုထားသည်။ ပြီးခဲ့တဲ့ ၂ ရက်က ရုံးထုတ်ရာတွင် အခြားသော နိုင်ငံရေး အကျဉ်းသားများနည်းတူ သူ၏ မိသားစုဝင်များလည်း တရားရုံး၏ စစ်ဆေးမှုကို ၀င်ရောက်ကြားနာခွင့် မရခဲ့ပေ။ အလားတူပင် ယခုတပတ်အတွင်း အင်းစိန်တရားရုံးတွင် ထိန်းသိမ်းထားသည် ၈၈ မျိုးဆက် ကျောင်းသား ခေါင်းဆောင်များနှင့်အတူ အဖမ်းဆီးခံထားရသည့် နိုင်ငံရေးလှုပ်ရှားသူများ၏ မိသားစုဝင်များက တရားခွင်အတွင်း ကြားနာခွင့် ရရှိရေးအတွက် နေပြည်တော်တွင် ရုံးထိုင်သည့် နိုင်ငံတော် တရားသူကြီးချုပ်ထံသို့ တောင်းဆို ထားခဲ့ကြသည်။ |
No comments:
Post a Comment