Tuesday, 30 December 2008 19:15 ဘုန်းခိုင်
စစ်တပ်အရာခံဗိုလ်က ကျေးရွာများကို အဆင့်မြင့်တိုးတက်အောင် လုပ်ပေးမည်ဟုဆိုကာ လောင်းကစားဝိုင်းများ လုပ်ခိုင်းနေပြီး သူ့ကိုယ်ကျိုးစီးပွားအတွက် လုပ်အားပေးခိုင်းစေမှုများ ပြုလုပ်နေသဖြင့် ဒေသခံရွာသားများ မကျေမနပ်ဖြစ်နေကြသည်။
မကွေးတိုင်း၊ ချောက်မြို့နယ်၊ ညောင်သုံးပင် မြဝတီထပ်ဆင့်အသံလွှင့်ရုံမှ တာဝန်ကျအရာခံဗိုလ် နိုင်ထူးက ကျေးရွာဥက္ကဌများကို ဆင့်ခေါ်ကာ အနီးနား ကျေးရွာများစည်ကားအောင် ပွဲတော်များအတင်းအကြပ် ကျင်းပစေသည်။ အဆိုပါပွဲများတွင် လေးကောင်ဂျင်၊ လောင်းကစားဝိုင်းများထည့်သွင်းကာ သူ့ကိုယ်ကျိုးအတွက် ငွေကြေးကောက်ခံနေခြင်းဖြစ်သည်။
“ကျေးရွာတွေကို အဆင့်မြင့်တိုးတက်အောင် လုပ်ပေးမယ်ဆိုပြီး လိုက်စစ်တာတွေလဲ လုပ်တယ်၊ ရွာတွေမှာ စည်ကားအောင် ရပ်ကွက်ပွဲတွေဘာတွေ လုပ်ခိုင်းတယ်၊ ပွဲမှာ ဂျင်ဝိုင်းတွေထည့်ခိုင်းတယ်၊ ရွာကလူတွေကလဲ ဒီနှစ်မှာက ပဲဈေးကလဲမကောင်းတော့ မလုပ်ချင်ကြဘူး”ဟု ဒေသခံ ရွာသားတဦးက ပြောသည်။
ထို့အပြင် အသံလွှင့်ရုံနှင့်နီးစပ်သည့် ဆည်ပေါက်ကံကျေးရွာအုပ်စုတွင်လည်း ကြက်ခြံဆောက်ရန်အတွက် တရွာလျှင် ဝါးအလုံး (၂၀) ကို အခမဲ့ တောင်းယူခဲ့သည့်အပြင် ကျောက်စရစ်လှည်း (၅) စီးနှင့် သဲများကိုလည်း ဒေသခံ ရွာသားများထံမှာ တောင်းယူခဲ့ကြောင်း ၎င်းရွာသားက ဆက်ပြောသည်။
“ဆည်ပေါက်ကံအုပ်စုထဲမှာ ရွာပေါင်း (၇) ရွာရှိတာ၊ အဲဒီမှာ (၈) လပိုင်းလောက်ကစပြီး ဝါးတွေတောင်းလိုက်၊ အဲလိုတွေ လုပ်တယ်၊ ပို့တဲ့ဝါးက ကောက်နေတယ်ဆိုရင် ဆဲဆိုပြီး ဖြောင့်တာနဲ့ ပြန်လဲခိုင်းတာတွေ လုပ်တယ်၊ နောက်ပြီး ရယကတွေ ရပ်မိရပ်ဖတွေကို အထူးအစည်းအဝေးဆိုပြီး ခဏခဏ ခေါ်တယ်၊ ရွာထဲက ဆိုင်ကယ်တွေကိုလဲ သူ့ကိုယ်ရေးကိုယ်တာသုံးဖို့ ချောဆွဲတာတွေ လုပ်တယ်၊ အဲဒါက အမြဲလိုလိုဖြစ်နေတာ၊ အခုထိဘဲ”ဟု ပြောသည်။
၎င်းအရာခံဗိုလ် နိုင်ထူးဆိုသူမှာ ပြီးခဲ့သည့် (၇) လပိုင်းအတွင်းက ချောက်မြို့နယ်၊ ညောင်သုံးပင် မြဝတီထပ်ဆင့်အသံလွှင့်ရုံသို့ ရောက်လာသူဖြစ်ပြီး ကျေးရွာအုပ်ချုပ်ရေးနှင့် မည်ကဲ့သို့ ပတ်သက်နေသည်ကို ဒေသခံများက မသိရကြောင်း ပြောဆိုသည်။
Subscribe to:
Post Comments (Atom)
No comments:
Post a Comment